ក្រុមបាល់ទាត់ជម្រើសជាតិយុវជនអាយុក្រោម ២៣ឆ្នាំកម្ពុជា បានចេញដំណើរទៅប្រទេសឥណ្ឌូនេស៊ីហើយ ដើម្បីចូលរួមប្រកួតជើងឯកបាល់ទាត់យុវជនអាយុក្រោម ២៣ឆ្នាំប្រចាំតំបន់អាស៊ីអាគ្នេយ៍ (ASEAN U23 Mandiri Cup™ 2025) ដែលនឹងប្រព្រឹត្តទៅពីថ្ងៃទី១៥ ដល់ថ្ងៃទី៣១ ខែកក្កដាខាងមុខ។

បន្ទាប់ពីចាកចេញពីមាតុភូមិ ទៅដល់ទីក្រុងហ្សាកាតា កាលពីល្ងាចថ្ងៃច័ន្ទកន្លងទៅ ក្រុមគោព្រៃជំទង់កម្ពុជា នឹងត្រូវបើកយុទ្ធនាការប្រកួតដំបូង ដោយត្រូវជួបក្រុមជម្រើសជាតិ U23 ឡាវ នាល្ងាចថ្ងៃទី១៦ ខែកក្កដា មុនជំនួបបញ្ចប់ពូលB ទល់នឹងក្រុមខ្លាំងវៀតណាម នាថ្ងៃទី២២ ខែកក្កដា ឆ្នាំ២០២៥។

គួរដឹងថា ការប្រកួតជើងឯកយុវជនប្រចាំតំបន់ ដែលឥណ្ឌូនេស៊ីធ្វើម្ចាស់ផ្ទះនេះ មានបេក្ខភាព ១០ក្រុមចូលរួម និងបែងចែកជា ៣ពូល ក្នុងនោះក្រុមជម្រើសជាតិ U23 កម្ពុជា ស្ថិតក្នុងពូលB ជាមួយវៀតណាម និងឡាវ គ្រាដែលពូលA មានម្ចាស់ផ្ទះឥណ្ឌូនេស៊ី ម៉ាឡេស៊ី ហ្វីលីពីន និងប្រ៊ុយណេ និងពូលC មាន ៣ក្រុម គឺមីយ៉ាន់ម៉ា ទីម័រខាងកើត និងថៃ។

បេសកកម្មនេះដែរ ក្រុមជម្រើសជាតិ U23 កម្ពុជា គឺដឹកនាំដោយគ្រូបង្វឹកលោក Koji Gyotoku ព្រមទាំងកីឡាករវ័យក្មេង ២៣នាក់ ដែលបានចម្រាញ់ចេញពីការធ្វើតេស្ដ និងប្រមូលផ្ដុំហ្វឹកហាត់ជាច្រើនសប្ដាហ៍កន្លងមក។ យ៉ាងណាអ្នកគាំទ្រ ក៏មានការសោកស្ដាយ ចំពោះកីឡាករមានសក្ដានុពលមួយចំនួន ដែលខកខានចូលរួមការប្រកួតនេះ ដោយសារជាប់ភារកិច្ចជួយក្លិបរៀងៗខ្លួន ក្នុងការត្រៀមរដូវកាលថ្មី ឆ្នាំ២០២៥/២៦ ខាងមុខផងដែរ៕

អត្ថបទ លី ឈុនឡា, រូបភាព មុំ ច័ន្ទសុធារិទ្ធ៕