ទាហានស៊ីរី បានចូលដល់ទីក្រុង Sweida របស់ក្រុមសាសនា Druze រយៈពេលច្រើននៃការប៉ះទង្គិចគ្នាជាមួយក្រុមកុលសម្ព័ន្ធ Bedouin ដែលបានសម្លាប់មនុស្សរាប់សិបនាក់ ។

ការដាក់ពង្រាយនៅថ្ងៃអង្គារនេះ បានកើតមានឡើង ក្រោយមេដឹកនាំសាសនា Druze ដែលធ្លាប់រឹងទទឹងចំពោះការដាក់ពង្រាយទាហានណាមួយរបស់ស៊ីរីនៅទីក្រុងភាគខាងត្បូងមួយនេះ បានជំរុញឲ្យក្រុមសកម្មប្រយុទ្ធ Druze ទម្លាក់អាវុធចុះ និងអនុញ្ញាតឲ្យកងកម្លាំងរដ្ឋាភិបាលចូល ។

យោងតាមការអះអាងរបស់ក្រុមឃ្លាំងមើលសិទ្ធិមនុស្សស៊ីរី បានឲ្យដឹងថា មនុស្សយ៉ាងហោច ៩៩នាក់ បានស្លាប់ និងមនុស្សប្រហែល ២០០នាក់ផ្សេងទៀត បានរងរបួសក្នុងរយៈពេល ២ថ្ងៃចុងក្រោយនៃការប៉ះទង្គិចគ្នារវាងក្រុមសកម្មប្រយុទ្ធ Druze និងក្រុមកុលសម្ព័ន្ធ Bedouin ក្នុងខេត្ត Sweida ។

ក្រុមឃ្លាំងមើលសិទ្ធិមនុស្សស៊ីរី និយាយទៀតថា មនុស្សស្លាប់ទាំងនេះ រួមមានក្រុមសកម្មប្រយុទ្ធ Druze ចំនួន ៦០នាក់ ជនស៊ីវិល ៤នាក់ ក្រុមសកម្មប្រយុទ្ធ Bedouin ១៨នាក់ កងកម្លាំងសន្តិសុខ ១៤នាក់ និងពលរដ្ឋគ្មានអត្តសញ្ញាណ ៧នាក់ ដែលស្លៀកពាកឯកសណ្ឋានយោធា ហើយនិងកងកម្លាំងប្រដាប់អាវុធ ១៨នាក់ ។

ក្រុមអាជ្ញាធរការពារជាតិ បានជំរុញឲ្យមានការអត់ធ្មត់ ដោយបានព្រមានថា ការបន្តប្រយុទ្ធនឹងធ្វើឱ្យទុក្ខលំបាករបស់ជនស៊ីវិលកាន់តែធ្លាក់ជ្រៅឡើង ហើយបានបញ្ជាក់ពីការប្តេជ្ញាចិត្តរបស់ខ្លួនក្នុងការស្តារស្ថិរភាពឡើងវិញ តាមរយៈប្រតិបត្តិការដែលត្រូវបានសម្របសម្រួលជាមួយកងកម្លាំងផ្ទៃក្នុង ៕