មន្ទីរបញ្ចកោណបាននិយាយកាលពីថ្ងៃអង្គារថា រដ្ឋមន្ត្រីក្រសួងការពារជាតិសហរដ្ឋអាមេរិក លោក Pete Hegseth បានបញ្ជាឱ្យដកកងទ័ពឆ្មាំជាតិចំនួន២.០០០នាក់ចេញពីទីក្រុង Los Angeles ជាចំនួនប្រហែលពាក់កណ្តាលនៃការដាក់ពង្រាយនៅក្នុងទីក្រុងដែលភាពចម្រូងចម្រាស់។

លោកប្រធានាធិបតី Donald Trump បានបញ្ជាឱ្យឆ្មាំជាតិរាប់ពាន់នាក់ និងទាហានម៉ារីនរាប់រយនាក់ចូលទៅក្នុងទីក្រុង Los Angelesកាលពីខែមុន ក្នុងការឆ្លើយតបទៅនឹងការតវ៉ាជុំវិញការបោសសម្អាតជនអន្តោប្រវេសន៍របស់សហព័ន្ធ ជាចំណាត់ការមួយដែលត្រូវបានប្រឆាំងដោយមេដឹកនាំទីក្រុង និងអភិបាលរដ្ឋកាលីហ្វ័រនីញ៉ា លោក Gavin Newsom ។

អ្នកនាំពាក្យមន្ទីរបញ្ចកោណលោក Sean Parnell បាននិយាយនៅក្នុងសេចក្តីថ្លែងការណ៍ថា «សូមអរគុណដល់កងទ័ពរបស់យើងដែលបានបង្កើនការឆ្លើយតបចំពោះការអំពាវនាវ ធ្វើឲ្យភាពគ្មានច្បាប់នៅក្នុងទីក្រុង Los Angeles ថយចុះ»។ លោកនិយាយថា «លោករដ្ឋមន្ត្រី បានបញ្ជាឱ្យដកឆ្មាំជាតិរដ្ឋកាលីហ្វ័រនីញ៉ាចំនួន២.០០០នាក់ពីបេសកកម្មការពារសហព័ន្ធ»។

អភិបាលក្រុង លោកស្រី Karen Bass បានសរសើរចំពោះការតវ៉ាដោយសន្តិវិធី និងចំណាត់ការផ្លូវច្បាប់សម្រាប់ការដកកងទ័ពនេះ ដែលលោកស្រីចាត់ទុកថា «ជាការដកត្រឡប់ទៅវិញ»។ លោកស្រីអភិបាលក្រុងគណបក្សប្រជាធិបតេយ្យរូបនេះបាននិយាយថា «រឿងនេះបានកើតឡើងដោយសារតែប្រជាជននៅទីក្រុង Los Angeles មានការរួបរួមគ្នា និងឈរយ៉ាងរឹងមាំ។ យើងរៀបចំការតវ៉ាដោយសន្តិវិធី យើងមកជួបជុំគ្នានៅកន្លែងប្រមូលផ្តុំ យើងបាននាំយករដ្ឋបាលរបស់លោក Trump ទៅកាន់តុលាការ។ ទាំងអស់នេះបាននាំឱ្យមានការដកកងទ័ពត្រឡប់ទៅវិញនៅថ្ងៃនេះ»។