​វាយ​កូន​បាល់៖ ​ការប្រកួត​វាយ​កូន​បាល់​ពានរង្វាន់ ATP Cup នៅ​ប្រទេស​អូស្ត្រាលី​រកឃើញ ៤​ក្រុម​ឡើង​វគ្គ​ពាក់កណ្តាល​ផ្តាច់ព្រ័ត្រ​អស់ហើយ បន្ទាប់ពី​ពីរ​ពូ​ល​ចុងក្រោយ​បញ្ចប់​ការប្រកួត​ម្សិលមិញ​។ ​​រុស្ស៊ី​ដែល​ស្ថិត​នៅ​ក្នុង​ពូ​ល B បាន​យកឈ្នះ​អ៊ីតាលី​ម្សិលមិញ​នេះ ២-១ ដើម្បី​ធានា​បាន​កៅអី​លេខ ១ ក្នុង​ពូ​ល​។

​​អ៊ីតាលី​បាន​នាំមុខ​ការប្រកួត​នេះ​មុន​តាមរយៈ​ជ័យជំនះ​របស់ Jannik Sinner លើ Roman Safiullin ៧-៦(៨-៦) និង ៦-៣ មុន​ពេល​ដែល​រុស្ស៊ី​តាម​ស្មើ​វិញ​តាមរយៈ​ជ័យជំនះ​របស់ Daniil Medvedev លើ Matteo Berrettini ៦-២, ៦-៧(៥-៧) និង ៦-៤​។ ​​ចុងក្រោយ​វិញ្ញាសា​វាយ​គូ​ កីឡាករ Daniil Medvedev ចាប់​ដៃគូ​ជាមួយ Roman Safiullin បាន​យកឈ្នះ Matteo Berrettini និង Jannik Sinner ដោយ​លទ្ធផល ៥-៧, ៦-៤ និង ១០-៥​។​ ​​ជ័យជំនះ​នេះ​ធ្វើឱ្យ​រុស្ស៊ី​ធានាបាន​កៅអី​លេខ ១ ក្រោយ​ឈ្នះ​ទាំង​ ៣​ប្រកួត​ក្នុង​ពូ​ល​នឹងត្រូវ​ជួប​ជាមួយ​ក្រុម​លេខ ១ ពូ​ល C គឺ​កាណាដា​។

​​កាណាដា​ចុងក្រោយ​បំផុត​បាន​យកឈ្នះ​ក្រុម​អាល្លឺម៉ង់ ២-០ ដោយ​កីឡាករ Danis Shapovalov យកឈ្នះ Jan-Lennard Struff និង Felix Auger-Aliassime យកឈ្នះ​ម្ចាស់​មេដាយមាស​អូឡាំពិក​ទីក្រុង​តូ​ក្យូ Alexander Zverev​។ ​​នេះ​ជា​ជ័យជំនះ​ដ៏​មាន​សារសំខាន់​មួយ​សំរាប់​កាណាដា​ដើម្បី​ឡើង​វគ្គ​បន្ទាប់ ដោយសារ​អង់គ្លេស​ក៏​ឈ្នះ​ប្រកួត​ចុងក្រោយ​ដែរ​ទៅលើ​អាមេរិក​តែ​បាន​ត្រឹម​លេខ ២ ក្នុង​ពូ​ល​។ ​វគ្គ​ពាក់កណ្តាល​ផ្តាច់ព្រ័ត្រ​ទី១ អេ​ស្ប៉ា​ញ និងប៉ូឡូញ​ជួបគ្នា​ថ្ងៃនេះ​ ខណៈ​កាណាដា និង​រុស្ស៊ី​ជួបគ្នា​ស្អែក​៕

​អត្ថបទ​៖​នាង សុភា​វុ​ធ