ទីភ្នាក់ងារស្ទាបស្ទង់ភូគព្ភសាស្ត្ររបស់សហរដ្ឋអាមេរិក (USGS) បានឲ្យដឹងថា រញ្ជួយដីកម្រិត ៧,៣រ៉ិចទ័រ បានកើតឡើងនៅម្ដុំឆ្នេរនៃរដ្ឋអាឡាស្ការបស់សហរដ្ឋអាមេរិក កាលពីថ្ងៃពុធ (ទី១៦ ខែកក្កដា) ដោយបង្កឲ្យមានការព្រមាន អំពីរលកយក្សស៊ូណាមិ។

USGS បានប្រាប់ថា រញ្ជួយដីបានកើតឡើងនៅម៉ោងប្រហែល ១២:៣៧ព្រឹក ម៉ោងក្នុងស្រុក (ត្រូវនឹងម៉ោង ៨:៣៧យប់ ម៉ោងសកល) ដោយចំណុចកណ្តាលនៃរញ្ជួយ ស្ថិតនៅចម្ងាយប្រហែល ៥៤ម៉ាយល៍ (៨៧គីឡូម៉ែត្រ) នៅភាគខាងត្បូងនៃទីក្រុងកោះ Sand Point។ ចំណុចកណ្តាលនៃរញ្ជួយដីមានជម្រៅ ២១គីឡូម៉ែត្រ។

អាជ្ញាធរបានចេញការព្រមាន អំពីរលកយក្សស៊ូណាមិ សម្រាប់រដ្ឋអាឡាស្កាភាគខាងត្បូង និងឧបទ្វីបអាឡាស្កា បន្ទាប់ពីមានការរញ្ជួយនេះ។ មជ្ឈមណ្ឌលព្រមានរលកយក្សស៊ូណាមិជាតិ នៅទីក្រុង Palmer (NTWC) រដ្ឋ Alaska បានឲ្យដឹងថា៖ «រលកយក្សស៊ូណាមិ ត្រូវបានបញ្ជាក់អះអាង ហើយមានការរំពឹងទុកពីផលប៉ះពាល់មួយចំនួន»។

តែ NTWC បានបញ្ជាក់បន្ថែមថា ដោយផ្អែកលើព័ត៌មានដំបូង ការព្រមានអំពីរលកយក្សស៊ូណាមិ មិនត្រូវបានចេញ សម្រាប់តំបន់ដែលនៅឆ្ងាយៗទេ៕