ប្រទេសស៊ីរី បានប្រកាសថា កងទ័ពរបស់ខ្លួនបានចាប់ផ្តើមដកចេញពីទីក្រុង Sweida ដែលរងការវាយប្រហារដោយអំពើហិង្សាកាលពីថ្ងៃពុធទី ១៦ ខែកក្កដា បន្ទាប់ពីរលកនៃការវាយប្រហាររបស់អ៊ីស្រាអែលលើរដ្ឋធានី ហើយសហរដ្ឋអាមេរិកបានអំពាវនាវឱ្យកងកម្លាំងរដ្ឋាភិបាលចាកចេញពីទីក្រុងភាគច្រើនក្នុងសហមន៍Druze ភាគខាងត្បូង។

សហរដ្ឋអាមេរិក ជាសម្ព័ន្ធមិត្តជិតស្និទ្ធជាមួយអ៊ីស្រាអែល កំពុងព្យាយាមចាប់ផ្តើមទំនាក់ទំនងរបស់ខ្លួនជាមួយប្រទេស៊ីរីឡើងវិញ ដោយបាននិយាយថា កិច្ចព្រមព្រៀងមួយត្រូវបានឈានដល់ដើម្បីស្តារឡើងវិញភាពស្ងប់ស្ងាត់នៅក្នុងតំបន់ ហើយបានជំរុញឱ្យភាគីទាំងអស់ អនុវត្តការប្តេជ្ញាចិត្តដែលពួកគេបានធ្វើ។

រដ្ឋាភិបាលស៊ីរី កាលពីមុននេះ បានប្រកាសបទឈប់បាញ់ថ្មីមួយនៅក្នុងទីក្រុង Sweida ដែលនឹងនាំឱ្យមានការផ្អាកប្រតិបត្តិការយោធានៅទីនោះ បន្ទាប់ពីការប៉ះទង្គិចគ្នាដែលអ្នកឃ្លាំមើលសង្គ្រាមបាននិយាយថា បានធ្វើឱ្យមនុស្សជាង៣៥០នាក់ស្លាប់ចាប់តាំងពីថ្ងៃអាទិត្យ។

សេចក្តីថ្លែងការណ៍របស់ក្រសួងការពារជាតិបាននិយាយថា កងទ័ពស៊ីរី «បានចាប់ផ្តើមដកខ្លួនចេញពីទីក្រុង Sweida ក្នុងការអនុវត្តលក្ខខណ្ឌនៃកិច្ចព្រមព្រៀងដែលបានអនុម័ត ក្រោយបញ្ចប់ការបោសសម្អាតទីក្រុងសម្រាប់ក្រុមក្រៅច្បាប់»។

សេចក្តីថ្លែងការណ៍ពុំបាននិយាយអំពីការដកកងកម្លាំងសន្តិសុខរដ្ឋាភិបាលផ្សេងទៀតដែលបានដាក់ពង្រាយទៅកាន់ទីក្រុងកាលពីថ្ងៃអង្គារ ក្នុងគោលបំណងត្រួតពិនិត្យបទឈប់បាញ់កាលពីពេលមុនដែលបានព្រមព្រៀងជាមួយមេដឹកនាំសហគមន៍ Druze បន្ទាប់ពីប៉ុន្មានថ្ងៃនៃការប្រយុទ្ធគ្នាដ៏បង្ហូរឈាមជាមួយកុលសម្ព័ន្ធ Bedouin ក្នុងតំបន់។