ទីភ្នាក់ងារសន្តិសុខរដ្ឋរបស់ប្រទេសហ្សកហ្ស៊ី នៅថ្ងៃព្រហស្បតិ៍ (ទី១៧ ខែកក្កដា) នេះ បានឲ្យដឹងថា ខ្លួនបានចាប់ឃុំខ្លួនមនុស្ស ២នាក់ ពីបទគ្រប់គ្រង និងប៉ុនប៉ងលក់សារធាតុអ៊ុយរ៉ានីញ៉ូមតម្លៃ ៣លានដុល្លារ ដែលអាចយកទៅប្រើប្រាស់កែច្នៃគ្រាប់បែកដ៏គ្រោះថ្នាក់បំផុត។

ទីភ្នាក់ងារសន្តិសុខនេះ បានបញ្ជាក់ថា ខ្លួនបានទប់ស្កាត់ «ឧក្រិដ្ឋកម្មឆ្លងដែន» ពាក់ព័ន្ធនឹង «ការលក់ និងការទិញដោយខុសច្បាប់នូវសមាសធាតុនុយក្លេអ៊ែរ ជាពិសេសសមាសធាតុគីមីវិទ្យុសកម្មអ៊ុយរ៉ានីញ៉ូម»។

សេចក្តីថ្លែងការណ៍របស់ទីភ្នាក់ងារបានឲ្យដឹងថា ពលរដ្ឋហ្សកហ្ស៊ីម្នាក់ និងជនបរទេសម្នាក់ ត្រូវបានចាប់ខ្លួននៅទីក្រុង Batumi ភាគខាងលិច នៅសមុទ្រខ្មៅ។ ជនទាំង ២រូប ដែលសេចក្តីថ្លែងការណ៍មិនបញ្ចេញឈ្មោះឲ្យដឹង អាចប្រឈមនឹងការជាប់ពន្ធនាគារ ១០ឆ្នាំ។

យ៉ាងណាក្ដី ទីភ្នាក់ងារសន្តិសុខរដ្ឋ មិនបានបង្ហើបឲ្យដឹងថា តើបរិមាណសារធាតុអ៊ុយរ៉ានីញ៉ូមមានកម្រិតប៉ុនណានោះទេ ប៉ុន្តែបានប្រាប់ថា វាគឺជាវិទ្យុសកម្មអាល់ហ្វា និងបេតាដ៏មានឥទ្ធិពល ដែលវាអាចត្រូវបានគេប្រើប្រាស់ ដើម្បីបង្កើតគ្រាប់បែកដ៏មហន្តរាយបំផុត។

ហ្សកហ្ស៊ី ដែលជាប្រទេសមានប្រជាជនប្រហែល ៣,៧លាននាក់ នៅតំបន់កូកាសភាគខាងត្បូង បានបំផ្លាញការប៉ុនប៉ងជាច្រើន ក្នុងការចរាចរសារធាតុអ៊ុយរ៉ានីញ៉ូម ឬសារធាតុវិទ្យុសកម្មផ្សេងទៀត គិតចាប់តាំងពីការបែកបាក់នៃសហភាពសូវៀត ក្នុងឆ្នាំ១៩៩១៕