មហាអំណាចអឺរ៉ុបទាំងបី E3 រួមមានបារាំង ចក្រភពអង់គ្លេស និងអាល្លឺម៉ង់ បានប្រាប់អ៊ីរ៉ង់ កាលពីថ្ងៃព្រហស្បតិ៍ (១៧ កក្កដា) ថា ពួកគេចង់ឱ្យទីក្រុងតេអេរ៉ង់ បន្តផ្លូវការទូតឡើងវិញភ្លាមៗ ជុំវិញកម្មវិធីនុយក្លេអ៊ែររបស់ខ្លួន ហើយព្រមានថា ប្រសិនបើពុំមានជំហានជាក់ស្តែងណាមួយកើតឡើងនៅចុងរដូវក្តៅនេះទេ អឺរ៉ុបនឹងស្តារទណ្ឌកម្មរបស់អង្គការសហប្រជាជាតិឡើងវិញលើអ៊ីរ៉ង់។

បណ្ដារដ្ឋមន្ត្រីការបរទេស E3 រួមជាមួយនឹងប្រធានគោលនយោបាយការបរទេសរបស់សហភាពអឺរ៉ុប បានព្រមានបែបនោះនៅក្នុងជំនួបតាមទូរសព្ទជាលើកដំបូងរបស់ពួកគេ ជាមួយរដ្ឋមន្ត្រីការបរទេសអ៊ីរ៉ង់ លោក Abbas Araqchi ចាប់តាំងពីអ៊ីស្រាអែល និងសហរដ្ឋអាមេរិក បានវាយប្រហារតាមអាកាសនៅពាក់កណ្តាលខែមិថុនា លើកម្មវិធីនុយក្លេអ៊ែររបស់អ៊ីរ៉ង់។

បន្ទាប់ពីជំនួបទូរសព្ទនេះ ប្រភពការទូតបារាំងមួយនិយាយថា រដ្ឋមន្ត្រី E3 បានជំរុញឱ្យអ៊ីរ៉ង់ បន្តកិច្ចប្រឹងប្រែងការទូតឡើងវិញភ្លាមៗ ដើម្បីឈានដល់កិច្ចព្រមព្រៀងនុយក្លេអ៊ែរ "ដែលអាចផ្ទៀងផ្ទាត់បាន និងយូរអង្វែង"។ គួរឱ្យដឹងថា អឺរ៉ុបបានព្រមានម្តងហើយម្តងទៀតថា លុះត្រាតែមានកិច្ចព្រមព្រៀងនុយក្លេអ៊ែរថ្មី បើពុំនោះទេពួកគេនឹងដាក់ "យន្តការត្រឡប់ទៅស្ថានភាពដើមវិញ" ដែលនឹងស្តារឡើងវិញនូវរាល់ទណ្ឌកម្មរបស់អង្គការសហប្រជាជាតិពីមុនលើអ៊ីរ៉ង់ ហើយក៏បានដាក់ពេលកំណត់ចុងខែសីហា ដើម្បីឱ្យអ៊ីរ៉ង់ចុះកិច្ចព្រមព្រៀង។

ខណៈទីក្រុងតេអេរ៉ង់ និយាយថាខ្លួនបើកចំហចំពោះការទូត គេពុំឃើញមានសញ្ញាណាមួយបង្ហាញថា កិច្ចចរចានុយក្លេអ៊ែរជុំទី៦ រវាងអាមេរិក និងអ៊ីរ៉ង់ នឹងចាប់ផ្តើមឡើងវិញក្នុងពេលឆាប់ៗទេ។ ក្រុមអ្នកការទូតនិយាយថា ទោះបីជាការចរចាថ្មីបន្តក៏ដោយ ការឈានដល់កិច្ចព្រមព្រៀងទូលំទូលាយមួយមុនដំណាច់ខែសីហា — ដែលជាថ្ងៃកំណត់ចុងក្រោយដែលអឺរ៉ុបបានផ្តល់ឱ្យ— ហាក់ដូចជាមិនប្រាកដប្រជាទាល់តែសោះ៕