អ៊ីស្រាអែល បានរុះរើអគាររាប់ពាន់ខ្នងនៅទូទាំងតំបន់ហ្កាហ្សា ចាប់តាំងពីបានដកខ្លួនចេញពីបទឈប់បាញ់មួយជាមួយក្រុមហាម៉ាស នៅក្នុងខែមីនាមក ដោយទីក្រុងទាំងមូល និងតំបន់ជាយក្រុង - ដែលធ្លាប់ជាផ្ទះជ្រកកោនសម្រាប់មនុស្សម្នារាប់ម៉ឺននាក់ - ត្រូវបានកម្ទេចចោលក្នុងប៉ុន្មានសប្តាហ៍កន្លងមកនេះ ក្នុងការតាមប្រម៉ាញ់បន្ទាយក្រុមសកម្មប្រយុទ្ធហាម៉ាស។

រូបភាពពីផ្កាយរណបបង្ហាញពីការបំផ្លិចបំផ្លាញយ៉ាងធំសម្បើមនៅក្នុងតំបន់ជាច្រើនដែលបញ្ជាការយោធារបស់អ៊ីស្រាអែលអះអាងថាស្ថិតនៅក្រោម "ប្រតិបត្តិការគ្រប់គ្រង"។ ភាគច្រើននៃការកម្ទេចអគារទាំងនោះត្រូវធ្វើឡើងដោយការបំផ្ទុះដែលបានគ្រោងទុក ឬបញ្ជាពីចម្ងាយ ទាំងអគារដែលខូចខាតរួចហើយ និងអគារដែលនៅសភាពដដែល។

វីដេអូដែលបានផ្ទៀងផ្ទាត់ បង្ហាញពីការផ្ទុះដ៏ធំដែលបញ្ចេញនូវផ្សែងធូលី និងកម្ទេចកម្ទី នៅពេលកងកម្លាំងអ៊ីស្រាអែលអនុវត្តការកម្ទេចដែលគ្រប់គ្រងលើប្លុកប៉មអគារ សាលារៀន និងហេដ្ឋារចនាសម្ព័ន្ធផ្សេងទៀត។ អ្នកជំនាញផ្នែកច្បាប់ជាច្រើនបានប្រាប់សារព័ត៌មាន BBC ថា អ៊ីស្រាអែលប្រហែលជាបានប្រព្រឹត្តឧក្រិដ្ឋកម្មសង្គ្រាម ក្រោមអនុសញ្ញាទីក្រុងហ្សឺណែវ ដែលភាគច្រើនហាមឃាត់ការបំផ្លាញហេដ្ឋារចនាសម្ព័ន្ធដោយអំណាចកាន់កាប់បែបនេះ។

អ្នកនាំពាក្យកងកម្លាំងការពារអ៊ីស្រាអែល (IDF) បាននិយាយថា ខ្លួនធ្វើប្រតិបត្តិការនោះស្របតាមច្បាប់អន្តរជាតិ ដោយចោទ ក្រុមហាម៉ាសថាលាក់បាំង "ទ្រព្យសម្បត្តិយោធា" ក្នុងតំបន់ស៊ីវិល ហើយថា "ការបំផ្លិចបំផ្លាញទ្រព្យសម្បត្តិទាំងនោះត្រូវបានអនុវត្តតែនៅពេលណាដែលមានតម្រូវការយោធាចាំបាច់ប៉ុណ្ណោះ"។ សារព័ត៌មាន BBC បានផ្ទៀងផ្ទាត់វីដេអូនៃហេដ្ឋារចនាសម្ព័ន្ធ ដែលកំពុងត្រូវបានកម្ទេចនៅក្នុងទីតាំងចំនួន៤០ ចាប់តាំងពីបទឈប់បាញ់មួយបានបញ្ចប់ក្នុងខែមីនាមក៕