នៅថ្ងៃសៅរ៍ (ទី១៩ ខែកក្កដា) នេះ សាធារណរដ្ឋប្រជាធិបតេយ្យកុងហ្គោ និងក្រុមឧទ្ទាម M23 បានចុះហត្ថលេខា នៅប្រទេសកាតា លើសេចក្តីប្រកាស អំពីគោលការណ៍ ដើម្បីបញ្ចប់ការប្រយុទ្ធគ្នា នៅភាគខាងកើតកុងហ្គោ។ សេចក្តីប្រកាសត្រូវបានចុះហត្ថលេខា រវាងតំណាងនៃភាគីទាំង ២ នៅទីក្រុងដូហា។

ក្រុមប្រដាប់អាវុធ M23 ដែលបានដណ្ដើមកាន់កាប់ដែនដីសម្បូរដោយធនធានរ៉ែយ៉ាងច្រើន នៅភាគខាងកើតកុងហ្គោ អំឡុងការវាយលុកយ៉ាងលឿនរហ័សដូចផ្លេកបន្ទោរ កាលពីខែមករា និងកុម្ភៈ បានទទូចស្វែងរកកិច្ចព្រមព្រៀងឈប់បាញ់ជាមួយទីក្រុង Kinshasa បន្ទាប់ពីសម្ព័ន្ធមិត្តរបស់ខ្លួន គឺប្រទេសរ៉្វាន់ដា បានចុះហត្ថលេខាលើកិច្ចព្រមព្រៀងសន្តិភាពនៅទីក្រុងវ៉ាស៊ីនតោន សហរដ្ឋអាមេរិក កាលពីខែមុន។

គួរបញ្ជាក់ថា ភាគខាងកើតនៃប្រទេសកុងហ្គោ បានជួបប្រទះនឹងជម្លោះរ៉ាំរ៉ៃអស់រយៈពេលជាង ៣ទស្សវត្សរ៍មកហើយ ដោយបានបង្កជាវិបត្តិមនុស្សធម៌ និងបង្ខំឲ្យមនុស្សរាប់សែននាក់ចាកចេញពីផ្ទះសម្បែងរបស់ពួកគេ។ មនុស្សរាប់ពាន់នាក់ត្រូវបានសម្លាប់ អំឡុងការវាយលុករបស់ក្រុម M23 កាលពីដើមឆ្នាំនេះ ជាពេលដែលឃើញក្រុមឧទ្ទាមមួយនេះដណ្តើមកាន់កាប់រដ្ឋធានីរបស់ខេត្តសំខាន់ៗចំនួន ២ គឺទីក្រុង Goma និង Bukavu។

សមរភូមិជួរមុខចាប់ផ្ដើមមានស្ថិរភាព តាំងពីខែកុម្ភៈមក ប៉ុន្តែការប្រយុទ្ធគ្នាតែងតែកើតឡើងជាញឹកញាប់ រវាងក្រុម M23 និងកងជីវពលគាំទ្ររដ្ឋាភិបាលជាច្រើន៕