អាជ្ញាធរអាល្លឺម៉ង់ បានប្រាប់ឲ្យដឹងថា យ៉ាងហោចណាស់មនុស្ស ១៩នាក់ បានរងរបួស ក្នុងនោះ ៤នាក់មានសភាពធ្ងន់ធ្ងរ បន្ទាប់ពីកាំជ្រួចបានផ្ទុះនៅកន្លែងតាំងពិព័រណ៍ ក្នុងទីក្រុង Dusseldorf ភាគខាងលិច។

ក្រុមពន្លត់អគ្គិភ័យ និងសេវាសង្គ្រោះបន្ទាន់ ត្រូវបានដាក់ពង្រាយ បន្ទាប់ពីមានឧបទ្ទវហេតុកាលពីល្ងាចថ្ងៃសុក្រ (ទី១៨ ខែកក្កដា) នៅឯព្រឹត្តិការណ៍ Rheinkirmes នៅតាមបណ្តោយទន្លេ Rhine ជាកន្លែងដែលរូបភាពពីកន្លែងកើតហេតុបង្ហាញឲ្យឃើញកាំជ្រួចកំពុងផ្ទុះ។ ទីភ្នាក់ងារសារព័ត៌មាន DPA បានរាយការណ៍ថា កុមារម្នាក់ស្ថិតក្នុងចំណោមអ្នករងរបួស។

ទីភ្នាក់ងារពន្លត់អគ្គិភ័យក្រុង Dusseldorf បានប្រាប់ថា នគរបាលកំពុងស៊ើបអង្កេតរកមូលហេតុដែលនាំឲ្យមានហេតុការណ៍គ្រោះថ្នាក់នេះ។ អ្នកនាំពាក្យ លោក Peter Dietlmaier បាននិយាយថា «ចិត្តគំនិតរបស់យើង គឺនៅជាមួយជនដែលរងគ្រោះ និងក្រុមគ្រួសាររបស់ពួកគេ។ យើងសូមជូនពរឲ្យអ្នករងរបួសទាំងអស់ឆាប់ជាសះស្បើយ។ យើងសោកស្តាយខ្លាំងណាស់ ដែលកើតមានគ្រោះថ្នាក់នេះ»។

គួរបញ្ជាក់ថា ពិព័រណ៍រយៈពេល ១០ថ្ងៃនេះ មានការជិះលេងកម្សាន្តនានា ការបង្ហាញយានដ្រូន និងកាំជ្រួច ហើយនិងការកម្សាន្តផ្សេងទៀត ដោយមានបុគ្គលិករាប់រយនាក់នៅតាមបណ្តោយច្រាំងខាងឆ្វេងនៃទន្លេ Rhine ទល់មុខតំបន់ប្រវត្តិសាស្ត្ររបស់ទីក្រុង៕