ក្រុមអាជ្ញាធរ បានប្រាប់ឲ្យដឹងថា កងកម្លាំងរុស្ស៊ីបានធ្វើការវាយប្រហារដ៏ធំ ដោយយានដ្រូនទៅលើទីក្រុងកំពង់ផែ Odesa នៅសមុទ្រខ្មៅរបស់អ៊ុយក្រែន នាព្រឹកថ្ងៃសៅរ៍ (ទី១៩ ខែកក្កដា) នេះ ដោយបានបណ្ដាលឲ្យអគ្គិភ័យឆាបឆេះឡើងយ៉ាងហោចណាស់នៅអគារផ្ទះល្វែងច្រើនជាន់ ១ខ្នង ខណៈមានអ្នកស្រុកម្នាក់បាត់បង់ជីវិត។

ក្នុងរយៈពេលប៉ុន្មានសប្តាហ៍ថ្មីៗនេះ រុស្ស៊ីបានបង្កើនការវាយប្រហាររបស់ខ្លួនទៅលើទីក្រុងនានារបស់អ៊ុយក្រែន ដែលជំរុញឲ្យប្រធានាធិបតីអាមេរិក លោក Donald Trump បង្ហាញជំហរប្រឆាំងយ៉ាងខ្លាំង ចំពោះរុស្ស៊ី និងគំរាមដាក់ទណ្ឌកម្មធ្ងន់ធ្ងរ។

ប្រធានាធិបតីអ៊ុយក្រែន លោក Volodymyr Zelenskyy បាននិយាយថា ការវាយប្រហារលើទីក្រុង Odesa បានបណ្ដាលឲ្យមនុស្ស ៦នាក់ រងរបួស ក្នុងនោះមានកុមារម្នាក់ផងដែរ។ ហើយតាមរយៈកម្មវិធីផ្ញើសារ Telegram លោកបានបន្ថែមថា រុស្ស៊ីបានបាញ់មីស៊ីលជាង ៣០គ្រាប់ និងយានដ្រូន ៣០០គ្រឿង ក្នុងអំឡុងពេលបើកការវាយលុកពេញមួយយប់ ដែលបានប៉ះពាល់ដល់តំបន់ចំនួន ១០ របស់ប្រទេស ហើយទន្ទឹមនឹងនោះ លោកបានអះអាងជាថ្មីអំពីសារៈសំខាន់នៃប្រព័ន្ធការពារដែនអាកាស។

គួរបញ្ជាក់ថា អ៊ុយក្រែនបានកំពុងស្នើសុំការគាំទ្របន្ថែមពីសម្ព័ន្ធមិត្ត ដើម្បីផ្តល់ជំនួយ និងការវិនិយោគ ក្នុងផលិតកម្មក្នុងស្រុក ដើម្បីទប់ទល់នឹងការវាយប្រហាររបស់រុស្ស៊ី៕