បាត់ដំបង៖ ឯកឧត្ដម ស្រេង វង្សហៀង ប្រធានក្រុមការងារ​គណបក្ស​ប្រជាជន​កម្ពុជា​ចុះជួយឃុំព្រះផុស ប្ដេជ្ញានឹងចាំជួយដោះស្រាយបញ្ហាជូនប្រជាពលរដ្ឋគ្រប់ពេលវេលា និងសន្យាបន្តសាងសង់ហេដ្ឋារចនាសម្ព័ន្ធឲ្យកាន់តែល្អប្រសើរថែមទៀតដើម្បីបម្រេីឲ្យមានភាពងាយស្រួលដល់ប្រជាពលរដ្ឋក្នុងមូលដ្ឋាន។

ឯកឧត្ដមក៏បានបញ្ជាក់ថា ឃុំព្រះផុសនឹងទទួលបានទឹកពីប្រភពទឹកធំមួយឈ្មោះទំនប់ដូនទ្រី ដែលកំពុងសាងសង់នៅក្នុងស្រុករុក្ខគីរី ហើយបច្ចុប្បន្ននេះប្រលាយទឹកមេមកកាន់ឃុំព្រះផុសក៏មានហើយផងដែរ។ បន្ទាប់ពីទំនប់នេះសាងសង់រួចរាល់ក្នុងឆ្នាំ២០២៣ ខាងមុខនេះក្រុមការងារចុះជួយឃុំព្រះផុស នឹងសិក្សាធ្វើប្រលាយបំបែកជូនប្រជាពលរដ្ឋ។

ការលើកឡើងនេះធ្វើឡើងក្នុងឱកាសឯកឧត្ដម និងលោកក្នុង​ឱកាស​សំណេះសំណាលជាមួយប្រជាពលរដ្ឋប្រមាណជាង ២០០គ្រួសារ ដែលរស់នៅក្នុងឃុំព្រះផុស ស្រុកគាស់ក្រឡ នាថ្ងៃទី៨ ខែមករា ឆ្នាំ២០២២ឯកឧត្ដម ស្រេង វង្សហៀង បានថ្លែងថាទោះបីជាកន្លងមកមានបញ្ហាដោយសារជំងឺកូវីដ១៩ ធ្វើឱ្យក្រុមការងារមិនបានចុះសួសុខទុក្ខបងប្អូនប្រជាពលរដ្ឋញឹកញាប់ តែក្រុមការងារតែងតែទាក់ទងជាមួយអាជ្ញាធរដើម្បីដឹងពីបញ្ហារបស់បងប្អូន និងបានផ្ដល់អំណោយដល់អ្នកក្រីក្រជាបន្តបន្ទាប់។

ឯកឧត្ដម បានអំពាវនាវដល់បងប្អូនប្រជាពលរដ្ឋ និងអាជ្ញាធរគ្រប់លំដាប់ថ្នាក់ សូមបន្តអនុវត្ដឱ្យបានខ្ជាប់ខ្ជួនតាមការណែនាំរបស់ក្រសួងសុខាភិបាលដើម្បីជៀសផុតពីការឆ្លងជំងឺកូវីដ១៩ ហើយត្រូវយកចិត្ដទុកដាក់ថែសុខភាពជាពិសេសលោកតា លោកយាយ មានវ័យចាស់ជរា ក្នុងអំឡុងពេលរដូវចុះត្រជាក់នេះ និងត្រូវយកចិត្ដទុកដាក់អប់រំកូនចៅ ឱ្យជៀសផុតពីគ្រឿងញៀន ល្បែងស៊ីសងគ្រប់ប្រភេទ និងត្រូវផ្អោតសំខាន់លើការសិក្សា។ 

លោកជំទាវ សុត សុវណ្ណដា ក៏បានអំពាវនាវទៅកាន់បងប្អូនប្រជាពលរដ្ឋបើមានបញ្ហា ឬត្រូវការសង្គ្រោះបន្ទាន់សូមរាយការណ៍ ទៅកាន់អាជ្ញាធរដើម្បីឱ្យអាជ្ញាធរធ្វើការបន្តមកក្រុមការងារ បើមិនដូចនេះបងប្អូនប្រជាពលរដ្ឋអាចមកកាន់ទីស្នាក់ការរបស់ក្រុមការងារផ្ទាល់ដែលមានអ្នកចាំទទួល ដើម្បីដោះស្រាយបញ្ហាជូនបងប្អូនឱ្យបានសមស្របតាមតម្រូវការ៕