យោងតាមអ្នកសិក្សាជនជាតិថៃ ដែលបានចូលរួមក្នុងជំនួបសមាគមវិទ្យាសាស្ត្រនយោបាយអន្តរជាតិ (IPSA) ឆ្នាំ២០២៥ ដែលធ្វើឡើងនៅទីក្រុងសេអ៊ូល ប្រទេសកូរ៉េខាងត្បូង ចាប់ពីថ្ងៃទី១២ ដល់ទី១៦ ខែកក្កដា បានឱ្យដឹងថា ប្រទេសថៃ ត្រូវបានចាត់ថ្នាក់ថាជាប្រទេសមានលទ្ធិប្រជាធិបតេយ្យមិនពេញលេញ ជាមួយនឹងកម្រិតនៃការជឿទុកចិត្តពីសាធារណៈជនទាបជាខ្លាំង។

លោកស្រីបណ្ឌិត Thawilwadee Bureekul អតីតនាយកការិយាល័យស្រាវជ្រាវ និងអភិវឌ្ឍន៍នៅវិទ្យាស្ថាន King Prajadhipok បានបើកបង្ហាញថា ការស្រាវជ្រាវ និងការស្ទង់មតិរួមគ្នាក្នុងតំបន់ បានគូសបញ្ជាក់ពីប្រទេសថៃថាមានភាគរយខ្ពស់បំផុតនៃប្រជាពលរដ្ឋដែលយល់ឃើញថា ការបែងចែកប្រាក់ចំណូលក្នុងប្រទេសនេះមានភាពអយុត្តិធម៌ ក្នុងចំណោមប្រជាជាតិអាស៊ីទាំងអស់ដែលបានសិក្សា។

លោកស្រីបាននិយាយថា "ការយល់ឃើញបែបនេះប៉ះពាល់យ៉ាងខ្លាំងដល់ជំនឿទុកចិត្តរបស់សាធារណៈជនចំពោះរដ្ឋាភិបាលថៃ ដែលបានឈានដល់កម្រិតទាបជាប្រវត្តិសាស្ត្រ" ដោយបន្ថែមថា ទំនុកចិត្តលើថ្នាក់ដឹកនាំរបស់ប្រទេសថៃ ឥឡូវនេះគឺទាបជាងពេលណាៗទាំងអស់។

លោកស្រីបណ្ឌិត Thawilwadee សង្កត់ធ្ងន់ថា បើទោះបីជាការយល់ដឹងផ្នែកនយោបាយកាន់តែប្រសើរឡើងក្នុងចំណោមពលរដ្ឋថៃក៏ដោយ ក៏ជំនឿរបស់ប្រជាជនលើប្រសិទ្ធភាពនយោបាយ និងឥទ្ធិពលរបស់ពលរដ្ឋលើការសម្រេចចិត្តរបស់រដ្ឋាភិបាលថៃ បានធ្លាក់ចុះគួរឱ្យកត់សម្គាល់។ ទិន្នន័យស្ទង់មតិដែលប្រមូលបានក្នុងពេល ២០ឆ្នាំចុងក្រោយនេះ ក៏បង្ហាញពីការធ្លាក់ចុះយ៉ាងគំហុកនៃទំនុកចិត្តលើស្ថាប័ននយោបាយសំខាន់ៗ រួមទាំងលើនាយករដ្ឋមន្ត្រី និងជាពិសេសលើព្រឹទ្ធសភាថៃផងដែរ៕