អ្នកឆ្លើយឆ្លងព័ត៌មានរបស់ទីភ្នាក់ងារ AFP និងប្រព័ន្ធផ្សព្វផ្សាយផ្លូវការ បាននិយាយថា អាជ្ញាធរស៊ីរី នៅថ្ងៃចន្ទ (ទី២១ ខែកក្កដា បានជម្លៀសក្រុមគ្រួសារនៃសហគមន៍ Bedouin ចេញពីទីក្រុង Sweida ជាទីដែលមានជនជាតិភាគតិច Druze រស់នៅភាគច្រើន បន្ទាប់ពីបទឈប់បាញ់ នៅខេត្តភាគខាងត្បូងមួយនេះ បានបញ្ឈប់ការប៉ះទង្គិចបង្ហូរឈាម រវាងសហគមន៍ទាំង២។

អ្នកឆ្លើយឆ្លងព័ត៌មានម្នាក់របស់ទីភ្នាក់ងារសារព័ត៌មាន AFP នៅខាងក្រៅទីរួមខេត្តដែលរងការបំផ្លិចបំផ្លាញ បានឃើញក្បួនរថយន្ត ក្នុងនោះមានរួមទាំងរថយន្តក្រុងផងដែរចូលទៅទីក្រុង Sweida ហើយបន្ទាប់មកដឹកជនស៊ីវិលចាកចេញមកវិញ។

អ្នកជម្លៀសខ្លួន រួមមានទាំងស្ត្រី និងកុមារផង ត្រូវបានដឹកនាំទៅកាន់ទីជម្រក នៅក្នុងខេត្តជិតខាង Daraa និងទៅកាន់រដ្ឋធានីដាម៉ាស ដោយមានការសម្របសម្រួលជាមួយអឌ្ឍចន្ទក្រហមរបស់ប្រទេសស៊ីរី។ ទីភ្នាក់ងារសារព័ត៌មានរដ្ឋ Sana បានរាយការណ៍ថា មនុស្ស ១.៥០០នាក់ មកពីកុលសម្ព័ន្ធ Bedouin នឹងត្រូវជម្លៀសចេញ។

គួរបញ្ជាក់ថា បើយោងតាមអ្នកឃ្លាំមើល បានឲ្យដឹងថា បទឈប់បាញ់ដែលបានប្រកាសកាលពីថ្ងៃទី១៩ ខែកក្កដា បានបញ្ចប់នូវអំពើហិង្សានិកាយសាសនា ដែលបានបណ្តាលឲ្យមនុស្សជាង ១.១០០នាក់ស្លាប់ ក្នុងរយៈពេល ១សប្តាហ៍៕