ទឹកជំនន់ ដែលជំរុញដោយភ្លៀងធ្លាក់យ៉ាងគំហុកក្នុងរដូវមូសុង និងព្យុះថ្មីៗនេះ បានធ្វើឱ្យជីវិតប្រជាជននៅក្នុងរដ្ឋធានីហ្វីលីពីន បន្តរងផលប៉ះពាល់យ៉ាងខ្លាំងនៅថ្ងៃអង្គារ (២២ កក្កដា) នេះ ដោយមនុស្សរាប់ម៉ឺននាក់ត្រូវបង្ខំចិត្តជម្លៀសខ្លួនចេញពីផ្ទះសម្បែងរបស់ពួកគេ ហើយមនុស្សជាច្រើននាក់ផ្សេងទៀត កំពុងបាត់ខ្លួនក្នុងមហន្តរាយធម្មជាតិនេះ។

សាលារៀន និងការិយាល័យរដ្ឋាភិបាលក្នុងទីក្រុងម៉ានីល និងខេត្តជុំវិញនោះ ត្រូវបិទទ្វារ បន្ទាប់ពីភ្លៀងធំពេញមួយយប់ ដែលមើលឃើញទន្លេ Marikina របស់តំបន់នេះហូរហៀរបាក់ច្រាំង។ យោងតាមក្រុមប្រឹក្សាកាត់បន្ថយ និងគ្រប់គ្រងហានិភ័យគ្រោះមហន្តរាយជាតិហ្វីលីពីន គិតត្រឹមព្រឹកថ្ងៃចន្ទ ព្យុះទីហ្វុង Wipha ដែលជាព្យុះទីហ្វុងទី៦ប្រចាំឆ្នាំ បានបណ្តាលឱ្យមនុស្សយ៉ាងតិច ៥នាក់ស្លាប់ មានអ្នកបាត់ខ្លួន ៧នាក់ និងប៉ះពាល់ដល់មនុស្សជាង ៨០០.០០០នាក់ ទូទាំងហ្វីលីពីន។

ទិន្នន័យបង្ហាញថា ទឹកជំនន់បានកើតឡើងនៅទូទាំងប្រទេស ដែលប៉ះពាល់ដល់ផ្លូវ និងស្ពានជាង ១០០កន្លែង។ ការផ្គត់ផ្គង់ថាមពលត្រូវបានរំខានជាបណ្ដោះអាសន្ននៅក្នុងផ្នែកនានានៃទីក្រុងចំនួន១១៥ ហើយលំនៅឋានជាង ១.២០០ខ្នង បានរងការខូចខាតខុសៗគ្នា។

ព្យុះធម្មតា ឬព្យុះទីហ្វុងយ៉ាងតិចចំនួន២០ វាយប្រហារ ឬចូលទៅជិតហ្វីលីពីន ក្នុងមួយឆ្នាំៗ ដោយតំបន់ដែលក្រីក្របំផុតរបស់ប្រទេសនេះ ជាធម្មតាទទួលរងការវាយប្រហារខ្លាំងបំផុត។ ព្យុះដ៏កំណាច និងបំផ្លិចបំផ្លាញ កាន់តែមានកម្លាំងខ្លាំងឡើង នៅពេលដែលសីតុណ្ហភាពពិភពលោកកាន់តែក្តៅ ដោយសារបម្រែបម្រួលអាកាសធាតុ៕