នរគបាល បាននិយាយថា ក្រុមសកម្មប្រយុទ្ធឥស្លាមនៅក្នុងប្រទេសប៉ាគីស្ថាន បានចាប់ផ្តើមប្រើប្រាស់យានដ្រូន Quadcopter ដែលបានទិញសម្រាប់បំណងពាណិជ្ជកម្ម ដើម្បីទម្លាក់គ្រាប់បែកលើកងកម្លាំងសន្តិសុខ នៅភាគពាយព្យនៃប្រទេសនេះ ដែលជាការវិវឌ្ឍដ៏គ្រោះថ្នាក់ នៅក្នុងតំបន់អស្ថិរភាពនេះ។

ក្រុមមន្ត្រី បាននិយាយថា ការប្រើប្រាស់យានដ្រូនបែបនេះ ដែលដំណើរការដោយកង្ហារចំនួន ៤ ដោយ   អាចឲ្យវាហោះឡើង និងចុះចតបញ្ឈរបាន កំពុងធ្វើឲ្យព្រួយបារម្ភដល់កម្លាំងនគរបាលដែលកំពុងចុះខ្សោយ និងបំពាក់បរិក្ខារមិនគ្រប់គ្រាន់ ដែលស្ថិតនៅជួរមុខក្នុងការប្រយុទ្ធប្រឆាំងនឹងការវាយប្រហាររបស់ក្រុមសកម្មប្រយុទ្ធ។

មន្ត្រីនគរបាលលោក Muhammad Anwar បាននិយាយថា យន្តហោះចម្បាំងពីរគ្រឿង ដែលត្រូវបានបាញ់បង្ហោះដោយក្រុមសកម្មប្រយុទ្ធ បានកំណត់គោលដៅលើប៉ុស្តិ៍នគរបាលមួយកន្លែង កាលពីដើមខែនេះ ដោយបានបណ្តាលឲ្យស្ត្រីម្នាក់ស្លាប់ និងកូនបីនាក់ រងរបួស នៅក្នុងផ្ទះក្បែរនោះ ក្នុងស្រុក Bannu។

លោកបាននិយាយថា យានដ្រូនមួយគ្រឿងដែលបានវាយប្រហារលើប៉ុស្តិ៍នគរបាលមួយផ្សេងទៀតកាលពីថ្ងៃសៅរ៍ ត្រូវបានបាញ់ទម្លាក់ជាមួយនឹងកាំភ្លើងវាយប្រហារ។ លោកបានបន្តថា យានដ្រូននោះ ត្រូវបានបំពាក់ដោយគ្រាប់កាំភ្លើងត្បាល់មួយគ្រាប់។

លោកបានអះអាងថា យ៉ាងហោចណាស់មានការវាយប្រហារដោយយានដ្រូនចំនួន ៨លើក បានកំណត់គោលដៅទៅលើនគរបាល និងកងកម្លាំងសន្តិសុខ នៅទីក្រុង Bannu និងតំបន់ជាប់គ្នា ក្នុងរយៈពេល   ពីរខែកន្លះចុងក្រោយនេះ។

ប្រធាននគរបាលក្នុងតំបន់ លោក Sajjad Khan បាននិយាយថា ក្រុមសកម្មប្រយុទ្ធ នៅតែព្យាយាមបន្ត ការប្រើប្រាស់យានដ្រូន។