មន្ទីរបញ្ចកោណ បានប្រកាសកាលពីថ្ងៃចន្ទថា កងម៉ារីនអាមេរិកចំនួន ៧០០នាក់ នៅក្នុងទីក្រុងឡូសអេនជឺឡេស កំពុងត្រូវបានដកចេញ ដោយបញ្ចប់ការដាក់ពង្រាយទាហានដ៏ចម្រោងចម្រាស នៅក្នុងទីក្រុងនេះ។

លោកប្រធានាធិបតី ដូណាល់ ត្រាំ ( Donald Trump) បានបញ្ជាឲ្យឆ្មាំជាតិរាប់ពាន់នាក់ និងទាហានម៉ារីនរាប់រយនាក់ ចូលទៅក្នុងទីក្រុងឡូសអេនជឺឡេស( Los Angeles) កាលពីខែមុន ដើម្បីជាការឆ្លើយតបទៅនឹងការតវ៉ាជុំវិញការបោសសម្អាតអន្តោប្រវេសន៍សហព័ន្ធ ដែលជាចំណាត់ការប្រឆាំងនឹងមេដឹកនាំទីក្រុង និងអភិបាលរដ្ឋកាលីហ្វ័រនីញ៉ាមកពីគណបក្សប្រជាធិបតេយ្យ លោក Gavin Newsom។

អ្នកនាំពាក្យមន្ទីរបញ្ចកោណលោក Sean Parnell បាននិយាយនៅក្នុងសេចក្តីថ្លែងការណ៍មួយថា រដ្ឋមន្ត្រីការពារជាតិលោក Pete Hegseth «បានដឹកនាំការដកមកវិញនូវទាហានម៉ារីនចំនួន ៧០០នាក់ ដែលវត្តមានរបស់ពួកគេ បានផ្ញើសារយ៉ាងច្បាស់ថា ភាពគ្មានច្បាប់ នឹងមិនត្រូវបានអត់ឱនឲ្យទេ»។

លោកបានបន្ថែមថា៖«ការឆ្លើយតបយ៉ាងឆាប់រហ័ស វិន័យម៉ឺងម៉ាត់ និងវត្តមានជាក់ស្តែង គឺជាការរួមចំណែក ក្នុងការស្ដារសណ្តាប់ធ្នាប់ និងការលើកកម្ពស់នីតិរដ្ឋ»។

អភិបាលក្រុងឡូសអេនជឺឡេស លោកស្រី Karen Bass ក៏បានប្រកាសពីការដកកងម៉ារីន នៅក្នុងការប្រកាសនៅលើបណ្តាញសង្គម X ដោយនិយាយថា នេះគឺជា «ការឈ្នះមួយផ្សេងទៀត» សម្រាប់ទីក្រុងនេះ ហើយថា វត្តមានរបស់កងទ័ព គឺជា«ការដាក់ពង្រាយមិនចាំបាច់»។