សារព័ត៌មាន Arab News បានដឹងថា ប្រទេសលីបង់ បានពន្យារពេលការអនុវត្តការរឹតបន្តឹងអាវុធ ចំពេលមានការព្រួយបារម្ភកាន់តែខ្លាំងឡើងអំពីការវិវឌ្ឍនៅក្នុងប្រទេសស៊ីរី ដែលនៅជិតខាង ទោះបីជាខ្លួននៅតែប្តេជ្ញាចិត្តក្នុងការដកអាវុធចេញពីកងជីវពលមិនមែនរដ្ឋ រួមទាំងក្រុមហេសបូឡាផងដែរ។

បេសកជនពិសេសរបស់សហរដ្ឋអាមេរិក លោក Tom Barrack បាននិយាយពីទីក្រុងបេរូត (Beirut) កាលពីថ្ងៃចន្ទ បាននិយាយថា បញ្ហានៃការរំសាយអាវុធរបស់ក្រុមហេសបូឡា នៅតែជាបញ្ហាក្នុងស្រុករបស់ប្រទេសលីបង់។

លោក Barrack ដែលបានអំពាវនាវឲ្យរដ្ឋាភិបាលស៊ីរី «ទទួលខុសត្រូវចំពោះការវិវឌ្ឍដែលបានកើតឡើងនៅខេត្ត Sweida» បាននិយាយថា៖«តាមដែលសហរដ្ឋអាមេរិក មានការព្រួយបារម្ភនោះ ក្រុមហេសបូឡា គឺជាក្រុមភេរវករបរទេស ដែលយើងមិនមានទំនាក់ទំនងផ្ទាល់ជាមួយទេ ហើយយើងកំពុងពិភាក្សាអំពីឯកសារនេះ ជាមួយរដ្ឋាភិបាលលីបង់»។

បន្ទាប់ពីកិច្ចប្រជុំរបស់លោកជាមួយនាយករដ្ឋមន្រ្តី Nawaf Salam លោក Barrack ដែលបានត្រឡប់ទៅទីក្រុងបេរូត ក្នុងដំណើរទស្សនកិច្ចលើកទី៣ របស់លោក ទៅកាន់ប្រទេសលីបង់ ដែលជាផ្នែកនៃបេសក កម្មរបស់ខ្លួន ដើម្បីបង្កើតយន្តការមួយ ក្នុងការអនុវត្តកិច្ចព្រមព្រៀងបទឈប់បាញ់ រួមទាំងការដកអាវុធរបស់ក្រុមហេសបូឡា បានសម្តែង«ការខកចិត្តរបស់សហរដ្ឋអាមេរិក ប្រសិនបើគ្មានកិច្ចព្រមព្រៀងណាមួយ ត្រូវបានសម្រេចលើបញ្ហាអាវុធ និងការបរាជ័យនៃកិច្ចព្រមព្រៀងបទឈប់បាញ់»។ លោកបានព្រមានថា នៅពេលនិយាយដល់ការធានានោះ «សហរដ្ឋអាមេរិកមិនអាចបង្ខំអ៊ីស្រាអែលឲ្យធ្វើអ្វីបានទេ»។