E-sport៖ ការប្រកួតកីឡាអេឡិចត្រូនិចថ្មីមួយទៀតលើវិញ្ញាសា Mobile Legend ពានរង្វាន់ T.Y Media E-Champion រដូវកាលទី១ នឹងចាប់ផ្ដើមការប្រកួតនាខែកុម្ភៈ ឆ្នាំ២០២២ ខាងមុខដែលមានប្រាក់រង្វាន់សរុបរហូតដល់ ១០០លានរៀល។ លោក លន់ សាមឌី អគ្គលេខាធិការសហព័ន្ធកីឡាអេឡិចត្រូនិកកម្ពុជា បានបង្ហាញការគាំទ្រពេញទំហឹងចំពោះការបង្កើតកម្មវិធីប្រកួតនេះឡើង ដើម្បីរួមចំណែកអភិវឌ្ឍន៍ និងពង្រឹងសមត្ថភាពធនធានកីឡាករសម្រាប់ត្រៀមការប្រកួតអន្ដរជាតិនានា ពិសេសការប្រកួតកីឡាស៊ីហ្គេម ២លើកចំពោះមុខគឺស៊ីហ្គេមឆ្នាំ២០២២ នៅវៀតណាម និងស៊ីហ្គេមឆ្នាំ២០២៣ នៅកម្ពុជា។
តាមរយៈនេះសហព័ន្ធនឹងគាំទ្រផ្នែកបច្ចេកទេស ដើម្បីជំរុញដំណើរការរៀបចំព្រឹត្តិការណ៍នេះឲ្យទទួលបានជោគជ័យ ស្របតាមនិយាមបច្ចេកទេសរបស់សហព័ន្ធ និងច្បាប់ប្រកួតអន្ដរជាតិ។ ប៉ុន្ដែក្រៅពីវិញ្ញាសា Mobile Legend ដែលកំពុងមានសន្ទុះគាំទ្រ និងការលេងច្រើន សហព័ន្ធក៏បានអំពាវនាវឲ្យក្រុមហ៊ុន និងដៃគូឯកជនពិចារណារៀបចំការប្រកួតលើវិញ្ញាសាផ្សេងៗទៀត ដើម្បីបង្កើតឱកាសថ្មី និងចូលរួមផលិតធនធានកីឡាករឲ្យកាន់តែមានប្រសិទ្ធភាពសម្រាប់ត្រៀមស៊ីហ្គេមផងដែរ។ លោក ធី វ៉ាយ អគ្គនាយកក្រុមហ៊ុន ធី វ៉ាយ មេឌា បានបង្ហាញនូវក្តីរីករាយដែលទទួលបានការគាំទ្រពីសហព័ន្ធ ដើម្បីរៀបចំការប្រកួតដ៏ធំនេះឡើងស្របតាមចក្ខុវិស័យ និងផែនការយុទ្ធសាស្ដ្ររបស់សហព័ន្ធ ដែលការប្រកួតនេះធ្វើឡើងក្នុងគោលបំណងពង្រឹងសមត្ថភាព និងបង្កើនធនធានកីឡាករ-កីឡាការិនី និងមន្ដ្រីបច្ចេកទេសសម្រាប់ត្រៀមរៀបចំការប្រកួតកីឡាស៊ីហ្គេម និងព្រឹត្តិការណ៍អន្ដរជាតិផ្សេងៗទៀត។
លោកបន្ដថា ការប្រកួតពានរង្វាន់ T.Y Media E-Champion រដូវកាលទី១ នេះនឹងមានក្រុមខ្លាំងៗ ៦ក្រុមចូលរួមក្នុងនោះក៏មានវត្តមានក្រុម See You Soon ដែលទើបចូលរួមប្រកួតជើងឯកពិភពលោក M3 នៅប្រទេសសិង្ហបុរីកាលពីចុងឆ្នាំ២០២១ កន្លងទៅផងដែរ។ ការប្រកួតនឹងចាប់ផ្ដើមពីថ្ងៃទី១០ ខែកុម្ភៈរហូតដល់ថ្ងៃទី០៣ ខែមេសា ឆ្នាំ២០២២។ ចំពោះប្រាក់រង្វាន់ជ័យលាភីវិញ ក្រុមលេខ១ នឹងទទួលបានប្រាក់រង្វាន់ ៥០លានរៀល, លេខ២ ទទួលបាន ២៥លានរៀល, លេខ៣ ទទួលបាន ១៥លានរៀល និងលេខ៤ ទទួលបាន ៤លានរៀល។ រីឯក្រុមពុំបានឡើងវគ្គបន្ដក៏ទទួលបានប្រាក់រង្វាន់ ១លាន ៥សែនរៀលក្នុងមួយក្រុមផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
