ប្រភពពាក់ព័ន្ធនឹងកិច្ចខិតខំប្រឹងប្រែងសម្របសម្រួលបទឈប់បាញ់នៅហ្កាហ្សា បាននិយាយកាលពីថ្ងៃអង្គារសប្ដាហ៍នេះ បេសកជនពិសេសរបស់សហរដ្ឋអាមេរិកប្រចាំតំបន់មជ្ឈិមបូព៌ាលោកSteve Witkoff សង្ឃឹមថានឹងធ្វើដំណើរទៅទីក្រុងDoha ប្រទេសកាតា នៅចុងសប្តាហ៍នេះ ដើម្បីជំរុញសម្រេចបានបទឈប់បាញ់ហ្កាហ្សា និងកិច្ចព្រមព្រៀងដោះលែងចំណាប់ខ្មាំងរវាងអ៊ីស្រាអែល និងក្រុមហាម៉ាស ។

 ប្រភពខាងលើបាននិយាយទៅកាន់សារព័ត៌មាន The Times of Israel ភ្លាមៗបន្ទាប់ពីអ្នកនាំពាក្យក្រសួងការបរទេសអាមេរិកលោកស្រី Tammy Bruce បានប្រកាសថា រដ្ឋមន្ត្រីការបរទេសអាមេរិក លោកMarco Rubio ទើបតែបានជូនដំណឹងដល់លោកស្រីថា លោក Witkoff កំពុងធ្វើដំណើរទៅកាន់តំបន់នោះរួចហើយ ហើយថាទីក្រុងវ៉ាស៊ីនតោន សង្ឃឹមខ្ពស់ចំពោះកិច្ចព្រមព្រៀងមួយ។  

លោកស្រី Bruce បាននិយាយក្នុងសន្និសីទសារព័ត៌មានខ្លីមួយជាមួយអ្នកយកព័ត៌មានថាលោក Witkoff កំពុងធ្វើដំណើរទៅកាន់តំបន់នោះឥឡូវនេះ ទៅតំបន់ហ្កាហ្សា ។ នៅពេលត្រូវបានសង្កត់ថា តើលោក Witkoff កំពុងធ្វើដំណើរទៅណា លោកស្រីបាននិយាយថាលោក Rubio ពុំបានផ្ដល់ព័ត៌មាន ជាក់លាក់ឲ្យលោកស្រីទេ។

ប៉ុន្តែប្រភពដែលពាក់ព័ន្ធនឹងកិច្ចខិតខំប្រឹងប្រែងសម្របសម្រួលបទឈប់បាញ់នោះ បាននិយាយថា តាមពិតលោក Witkoff នៅតែស្ថិតនៅក្នុងសហរដ្ឋអាមេរិក ហើយគ្រោងនឹងចាកចេញនៅថ្ងៃពុធនេះប៉ុណ្ណោះ ។

វត្តមានរបស់លោក Witkoff នៅទីក្រុង Doha ត្រូវបានគេកំណត់ថាជាសូចនាករមួយដែលថាការចរចាជិតឈានដល់ការបញ្ចប់ ខណៈក្រុមអ្នកចរចាបាននិយាយថារូបលោកគ្រាន់តែចង់ចូលរួមក្នុងការចរចានៅពេលឈានដល់ចំណុចមួយដែលពួកគេត្រៀមខ្លួនប្រកាសសម្រាប់កិច្ចព្រមព្រៀង៕