ប្រមុខចារកម្មយោធាអ៊ុយក្រែន លោក Kyrylo Budanov បាននិយាយកាលពីថ្ងៃអង្គារ (២២ កក្កដា) ថា រុស្ស៊ី គ្រោងនឹងចំណាយប្រាក់ប្រហែល ១,១សែនកោដិដុល្លារ លើការបំពាក់អាវុធឡើងវិញក្នុងរយៈពេល ១១ឆ្នាំខាងមុខ ដើម្បីត្រៀមរៀបចំសម្រាប់លទ្ធភាពនៃសង្គ្រាមទ្រង់ទ្រាយធំនាពេលអនាគត។

លោក Budanov និយាយថា ទីក្រុងមូស្គូបានចាប់ផ្តើមកម្មវិធីអាវុធដែលមានមហិច្ឆតាធំបំផុតរបស់ខ្លួនចាប់តាំងពីការដួលរលំនៃសហភាពសូវៀតមក ហើយថា រុស្ស៊ីកំពុងកៀងគរគ្រប់ផ្នែកទាំងអស់នៃសង្គមដើម្បីគាំទ្រដល់ការកសាងយោធារបស់ខ្លួន។

ថ្លែងក្នុងអំឡុងកិច្ចប្រជុំប្រចាំឆ្នាំរបស់ឯកអគ្គរដ្ឋទូតអ៊ុយក្រែន ប្រធានចារកម្មរូបនេះលើកឡើងថា៖ "មានការប្រមូលផ្តុំផ្នែកនយោបាយ សេដ្ឋកិច្ច និងសង្គមនៃសហព័ន្ធរុស្ស៊ីទាំងមូល ដើម្បីត្រៀមខ្លួនសម្រាប់ធ្វើសង្រ្គាមទ្រង់ទ្រាយធំនាពេលខាងមុខ"។

ជាផ្នែកមួយនៃកំណែទម្រង់នេះ រុស្ស៊ីបង្កើតតំបន់យោធាថ្មីចំនួនពីររួចមកហើយ គឺនៅទីក្រុងមូស្គូ និងលេនីងរ៉ាត (Leningrad) ហើយកំពុងរៀបចំបង្កើតកងពលបន្ថែម និងអង្គភាពយោធា។ លោក Budanov និយាយថា គោលដៅរបស់វិមានក្រឹមឡាំងមិនមែនគ្រាន់តែជាការត្រួតត្រាក្នុងតំបន់ប៉ុណ្ណោះទេ ប៉ុន្តែជាការកែប្រែសណ្តាប់ធ្នាប់ពិភពលោកទាំងមូលឡើងវិញ។

ការអត្ថាធិប្បាយនេះកើតឡើងបន្ទាប់ពីការព្រមានកាន់តែច្រើនឡើងពីសេវាចារកម្មលោកខាងលិច អំពីការកសាងកម្លាំងយោធារយៈពេលវែងរបស់រុស្ស៊ី។ កាលពីឆ្នាំមុន ប្រមុខចារកម្មអាល្លឺម៉ង់ និយាយថា ទីក្រុងមូស្គូនឹងមានសមត្ថភាពយោធាដើម្បីវាយប្រហារណាតូនៅឆ្នាំ២០៣០៕