សម្រាប់លោកប្រធានាធិបតី Donald Trump ការពាក់ព័ន្ធរបស់សហរដ្ឋអាមេរិក ក្នុងសង្រ្គាមនៅអ៊ុយក្រែន អាចក្លាយជាអ្វីដែលអ្នកស្នងតំណែងមុនរបស់លោក គឺលោក Joe Biden ជួបក្នុងសង្រ្គាមនៅអាហ្វហ្កានីស្ថាន។ បើយោងតាមអត្ថបទរបស់ទីភ្នាក់ងារសារព័ត៌មាន Bloomberg បានបង្ហាញថា មើលភ្លាមៗ ការប្រៀបធៀបនេះ អាចហាក់ដូចជាមិនគួរឲ្យជឿនោះឡើយ ត្បិតសហរដ្ឋអាមេរិកមិនបានបញ្ជូនកងទ័ពទៅអ៊ុយក្រែន ប៉ុន្តែគ្រាន់តែផ្តល់ជំនួយប៉ុណ្ណោះ។

តែអត្ថបទនេះ បានបញ្ជាក់ថា៖ «ទោះជាយ៉ាងណាក៏ដោយ សម្រាប់ប្រធានាធិបតី លោក Donald Trump អ្វីដែលមានភាពស្រដៀងគ្នានោះ គឺថា ការដោះស្រាយជម្លោះមិនមែនជាកិច្ចការងាយស្រួលឡើយ ហើយកាន់តែអូសបន្លាយពេលយូរ។ រូបលោកកាន់តែប្រឈមនឹងហានិភ័យធ្លាក់ចូលទៅក្នុងអន្ទាក់នៃការទទួលខុសត្រូវ និងអាចមានកំហុស»។ ហើយអត្ថបទនោះ បានបន្ថែមទៀតថា ការចូលរួមកាន់តែជ្រៅទៅៗ នៅក្នុងជម្លោះនេះ នឹងនាំឲ្យអ្នកគាំទ្រគោលនយោបាយ «ធ្វើឲ្យអាមេរិកអស្ចារ្យម្តងទៀត» ខឹងសម្បា។

អត្ថបទនេះបានសរសេរទៀតថា៖ «ប៉ុន្តែប្រសិនបើរុស្ស៊ីត្រូវបានបណ្ដោយឲ្យទទួលបានសន្ទុះឥតឈប់ឈរដោយគ្មានជំនួយបន្ថែមនោះ លោក Trump អាចត្រូវបានមើលទៅហាក់ដូចជាទន់ខ្សោយ ហើយប្រឈមនឹងការចោទប្រកាន់ ដែលថា រូបលោកមិនបានធ្វើអ្វីគ្រប់គ្រាន់ ដើម្បីរារាំងប្រធានាធិបតីរុស្ស៊ី លោក Vladimir Putin»។

ក្នុងពេលជាមួយគ្នានេះ លោក Trump កំពុងព្យាយាមជាប់ជានិច្ច ក្នុងការធ្វើយ៉ាងណាកុំឲ្យរូបលោកពាក់ព័ន្ធនឹងជម្លោះនេះ ដោយនិយាយម្តងហើយម្តងទៀតថា សង្រ្គាមនឹងមិនចាប់ផ្តើមឡើយ នៅក្រោមការដឹកនាំរបស់លោក ហើយបញ្ជាក់យ៉ាងច្បាស់ថា លោកមិនទទួលខុសត្រូវចំពោះលទ្ធផលរបស់វាទេ។

យ៉ាងណាក្ដី ការប្រៀបធៀប រវាងសង្រ្គាមទាំង ២ បានលេចឡើងម្តងហើយម្តងទៀតនៅក្នុងអត្ថាធិប្បាយរបស់អ្នកជំនាញ។ ប៉ុន្មានខែមុនជាប់ឆ្នោតឡើងវិញរបស់លោក Trump ក្នុងខែវិច្ឆិកា អ្នកសរសេរអត្ថបទសារព័ត៌មាន Washington Post លោក Marc Thiessen បានព្រមានក្រុមសាធារណរដ្ឋ អំពីគ្រោះថ្នាក់នៃការរារាំងជំនួយបន្ថែមដល់អ៊ុយក្រែន។ លោកបានសរសេរថា៖ «វាគឺជាជម្រើសរបស់គណបក្សសាធារណរដ្ឋ។ ប្រសិនបើអ្នកមិនចង់ទទួលការស្តីបន្ទោសថា បានធ្វើឲ្យទីក្រុងគីវដួលរលំ ដូចដែលលោក Biden ត្រូវបានស្តីបន្ទោស ចំពោះការដួលរលំនៃទីក្រុងកាប៊ុលទេនោះ សូមបញ្ជូនជំនួយយោធាទៅអ៊ុយក្រែន»៕