ពិភពលោក៖ ​សហព័ន្ធ​សកល​បាន​បញ្ជាក់​នៅ​ថ្ងៃ​ព្រហស្បតិ៍​នេះ​ថា គិលានុបដ្ឋាក​យ៉ាងហោចណាស់​ ៣ពាន់​នាក់បាន​ស្លាប់​ដោយសារ​ជំងឺ Covid-19 ខណៈ​ខ្លួន​ព្រមាន​ពី​ការ​កើន​ឡើង​កាន់​តែ​ច្រើន​ថែមទៀត​ នៃ​ក្រុម​បុគ្គលិក​សុខភាព​ប៉ះពាល់​ដោយសារ​ជំងឺ​ រាតត្បាត​សកល​មួយ​នេះ នឹង​ចាក​ចេញពី​តួនាទី​របស់​ខ្លួន​។

​​រយៈពេល​មួយ​ឆ្នាំ​ហើយ​ ចាប់​តាំង​ពី​អង្គការ​សុខភាព​ពិភពលោក ​(WHO) បាន​ហៅ​ជំងឺ​ COVID-19 ថា ​ជា​ជំងឺ​រាតត្បាត​សកល​លើកដំបូង ក្រុមប្រឹក្សា​គិលានុបដ្ឋាក​អន្តរជាតិ​ហៅ​កាត់​ថា (ICN) ​បាន​និយាយ​ថា សម្ពាធ​រាងកាយ​ និង​ផ្លូវចិត្ត​ដ៏​ខ្លាំងក្លា​នេះ​ បាន​បណ្ដាល​ឲ្យ​គិលានុ​បដ្ឋាក​រាប់​លាន​នាក់ ​ពិចារណា​ចង់​បោះបង់ចោល​អាជីព​របស់​ខ្លួន​។​ នាយក​ប្រតិបត្តិ​សហព័ន្ធ​សកល លោក Howard Catton បាន​និយាយ​ថា ​គិលានុបដ្ឋាក​បាន​ឆ្លងកាត់​ការ​ប៉ះ​ទង្គិច​ផ្លូវចិត្ត​យ៉ាង​ខ្លាំង ​ក្នុង​អំឡុង​ជំងឺ​រាត​ត្បាត​សកល ដែល​បាន​បណ្ដាល​ឱ្យ​អស់កម្លាំង​ ទាំង​ផ្នែក​រាងកាយ និង​ផ្លូវចិត្ត​។​

​សហព័ន្ធ​នេះ​បាន​លើក​ឡើង​ថា ​ចំនួន​គិលានុបដ្ឋាយិកា​ដែល​បាន​ស្លាប់ ​ដោយ​ជំងឺ​នេះ​ត្រូវ​បាន​ចង​ក្រង​ឯកសារ​ចេញពី​ប្រទេស​ចំនួន ៦០ ទំនងជា​អត្រា​ប៉ាន់ប្រមាណ​ក្រោម​ចំនួន​សរុប​។​ ដោយ​ត្រូវ​បាន​បង្កើត​ឡើង​នៅ​ក្នុង​ឆ្នាំ១៨៩៩ ​សហព័ន្ធ​សកល​មួយ​នេះ​មាន​សហគមន៍​គិលានុ​បដ្ឋាក​ជាតិ​ជាង ​១៣០​អង្គភាព​៕

អត្ថបទ៖ សុខមាន