គណៈកម្មការអឺរ៉ុបគ្រោងដាក់សំណើវិធានការដំឡើងពន្ធតប លើទំនិញអាមេរិក ដែលគិតជាទឹកប្រាក់ចំនួន ៩៣ពាន់លានអឺរ៉ូ (១០៩ពាន់លានដុល្លារ) ដើម្បីសុំការយល់ស្របពីសមាជិកសហភាពអឺរ៉ុប (EU) ខណៈដែលប្រធានពាណិជ្ជកម្មរបស់ប្លុកនេះ នឹងជួបពិភាក្សាជាមួយរដ្ឋមន្ត្រីក្រសួងពាណិជ្ជកម្មអាមេរិក លោក Howard Lutnick។

នៅថ្ងៃពុធ (ទី២៣ ខែកក្កដា) នេះ គណៈកម្មការបានឲ្យដឹងថា ការផ្តោតចម្បងរបស់ខ្លួន គឺដើម្បីសម្រេចបាននូវលទ្ធផលទទួលយកបានទាំងសងខាង ជាមួយសហរដ្ឋអាមេរិក ដើម្បីបញ្ចៀសអត្រាពន្ធចំនួន ៣០ភាគរយ ដែលប្រធានាធិបតីអាមេរិកលោក Donald Trump បាននិយាយថា លោកនឹងដាក់លើប្លុកមានសមាជិកចំនួន ២៧ប្រទេសនេះ នៅថ្ងៃទី១ ខែសីហា។

ស្នងការពាណិជ្ជកម្មអឺរ៉ុប លោក Maros Sefcovic នឹងពិភាក្សាជាមួយលោក Lutnick នាថ្ងៃពុធនេះ មុនពេលមន្ត្រីគណៈកម្មការអឺរ៉ុប នឹងធ្វើបច្ចុប្បន្នភាពទៅកាន់ឯកអគ្គរដ្ឋទូត EU អំពីស្ថានភាពបច្ចុប្បន្ន។

គណៈកម្មការរបានឲ្យដឹងថា ខ្លួននឹងបន្តជំរុញលទ្ធភាពនៃការមានវិធានការតបតនេះ និងការចរចា ក្នុងពេលជាមួយគ្នា។ ហើយគណៈកម្មការបានបញ្ជាក់ថា ខ្លួននឹងបញ្ចូលនូវសំណុំពន្ធដែលអាចមានចំនួន ២១ពាន់លានអឺរ៉ូ និង ៧២ពាន់លានអឺរ៉ូទៅក្នុងបញ្ជីតែមួយ។

ទន្ទឹមនឹងនេះ គណៈកម្មការបានបន្ថែមថា ខ្លួននឹងបញ្ជូនសំណើនេះទៅសមាជិក EU ដើម្បីសុំការយល់ស្រប។ តែយ៉ាងណាក្ដី គ្មានវិធានការតបត នឹងចូលជាធរមាននោះឡើយ រហូតដល់ថ្ងៃទី៧ ខែសីហា។ រហូតមកដល់ពេលនេះ EU មិនទាន់បានដាក់វិធានការតបតណាមួយទេ ដោយបានយល់ព្រមឲ្យមានវិធានការ ប៉ុន្តែបន្ទាប់មក បានផ្អាកភ្លាមៗ ដែលជាសំណុំដំបូង កាលខែមេសា៕