កំពង់ធំ៖ សាលារៀនបឋមសិក្សាគ្រប់កកម្រឹតថ្នាក់ ទាំងសាលារដ្ឋ និងឯកជន ចាប់ផ្តើមបើកឲ្យដំណើរការ ចូលរៀនឡើងវិញក្នុងឆ្នាំសិក្សា ២០២១-២០២២ ក្នុងបរិបទនៃការចូលរៀនបែបគន្លងថ្មី ដោយប្រកាន់ភ្ជាប់នូវ អនាម័យតាមវិធានសុខាភិបាល។ 

 នៅព្រឹកថ្ងៃទី១០ ខែមករា ឆ្នាំា២០២២, លោក ចាន់ តារា អភិបាលរងខេត្តកំពង់ធំ អញ្ជើញជាអធិតីក្នុងពិធីបើកបវេស្សនកាលនៅសាលាបឋមសិក្សា ហ៊ុន សែន អាចារ្យលាក់។ ជាមួយគ្នានេះលោក លើកឡើងថា ដំណើរការនៃការចូលរៀនក្នុងឆ្នាំសិក្សាថ្មី ២០២១-២០២២ សម្រាប់កុមារា កុមារី គឺជាការយកចិត្តទុកដាក់បំផុតរបស់រាជរដ្ឋាភិបាល ដែលមានក្រសួងអប់រំ ជាសេនាធិការ ដោយផ្ទាល់។ ទន្ទឹមនេះ លោកគ្រូ អ្នកគ្រូ ត្រូវយកចិត្តទុកដាក់ក្នុងអប់រំ ផ្ទេរចំណេះដឹងទៅកាន់សិស្ស របស់ខ្លួនឲ្យបានម៉ត់ចត់បំផុត ជាពិសេសបង្កើនការយកចិត្តទុកដាក់លើការរក្សាអនាម័យដោយពិនិត្យទៅលើ ការពាក់ម៉ាស់ និងប្រើប្រាស់អាល់ ឬជែលជាដើម នៅក្នុងថ្នាក់រៀន។ ជាមួយគ្នានេះ ក៏ត្រូវរៀបចំកន្លែងលាងដៃ បានសមស្រប ដែលទឹកគ្រប់គ្រាន់ និងសាប៊ូជាប្រចាំ ត្រូវធានាថា ការបើកឲ្យដំណើរការចូលរៀនឡើង វិញក្នុងពេលនេះ ធ្វើសិស្សទទួលបានចំណេះ និងមានសុវត្ថិភាពខ្ពស់ជៀសផុតពីការឆ្លងជំងឺកូវីដ១៩ នៅក្នុងសាលារៀន។ 

 ក្នុងឱកាសនេះផងដែរ ក្រុមមាតាសិស្សលើកឡើងថា កូនៗរបស់ពួកគាត់ បានអាក់ខានមិនបានមក សាលារៀនអស់រយៈពេលជិត២ឆ្នាំមកហើយ! ថ្ងៃនេះ គឺឱកាសមួយដែលកូនរបស់ពួកគាត់អាចកជួប មិត្តភ័ក្តិ លោកគ្រូ អ្នកគ្រូ ដោយផ្ទាល់ឡើងវិញ។ ជាពិសេស កូនៗតូចៗរបស់អាចទទួលបានចំណេះដឹងបានល្អ ប្រសើរជាងការរៀនតាមប្រព័ន្ធ Online និងបណ្តុះស្មារតីឲ្យកូនៗរបស់គាត់មានទំនាក់ទំនងសង្គម មានភាពក្លាហានផងដែរ។

លោក តាន់ ប៊ុនហុង ប្រធាមន្ទីរអប់រំ យុវជន និងកីឡាខេត្តកំពង់ធំបានប្រាប់ថា ឆ្នាំសិក្សា ២០២១-២០២២ 

ក្នុងការបើកឲ្យដំណើរចូលរៀនសម្រាប់សិស្សថ្នាក់វិទ្យាល័យ និងអនុវិទ្យាល័យកន្លងមក, ដំណើរនៃការ រៀន និងបង្រៀនប្រព្រឹត្តទៅប្រកបដោយសុវត្ថិភាព គុណភាព និង និរន្តរភាព។ ក្នុងនោះគ្រឹះស្ថានសិក្សាទាំងអស់ បានត្រៀមរួចជាស្រេចនូវសម្ភារអនាម័យ ម៉ាស អាល់កុល ដែល សាប៊ូ ឧបករណ៍វាស់ស្ទង់កម្ដៅស្វ័យប្រវត្តិ ការសម្អាតបរិស្ថាន ការកសាងហេដ្ឋារចនាសម្ព័ន្ធសុវត្ថិភាពបង្គន់អនាម័យ និងប្រព័ន្ធទឹកស្អាតនិងកន្លែង លាងសម្អាតដៃបន្ថែមផងដែរ។ លោកបញ្ជាក់ថា ក្នុងខេត្តកំពង់ធំ ក្នុងឆ្នាំសិក្សា២០២១ -២០២២ រួមមាន សាលាមត្តេយ្យសិក្សារដ្ឋមានចំនួន២១០កន្លែង ស្មើ៣១២ថ្នាក់ មានសិស្សសរុប៩,៦៦៥នាក់។ មត្តេយ្យសិក្សាសហគមន៍ មាន ១៩៦ កន្លែង មានថ្នាក់ ១៩៦ ថ្នាក់ សិស្សសរុបចំនួន៤,៧០២នាក់។ សាលាបឋមសិក្សាមានចំនួន៤៩៣សាលា ចែកចេញជា ៧៦កម្រងសាលារៀន ដែលមានថ្នាក់សរុបចំនួន២,៤៨៨ថ្នាក់ មានសិស្សសរុបចំនួន៩៩,៨៩៣នាក់ ស្រី៤៨,៧៣០នាក់។ សាលាមធ្យមសិក្សាមានចំនួន៩២សាលា ក្នុងនោះអនុវិទ្យាល័យចំនួន ៦៧សាលា មានថ្នាក់ ចំនួន៣៧៤ថ្នាក់ និងវិទ្យាល័យចំនួន ២៥កន្លែង មាន៥៩៩ថ្នាក់ មានសិស្សសរុបចំនួន៤៦,១៣៨នាក់ ស្រី២៥,៤៥៥នាក់ ៕