អ៊ីរ៉ង់ កាលពីថ្ងៃពុធ ទី២៣ ខែកក្កដា បាននិយាយថា ខ្លួនបានព្រមាននាវាពិឃាតរបស់កងទ័ពជើងទឹកសហរដ្ឋអាមេរិកឱ្យផ្លាស់ប្តូរទិសដៅ ខណៈនាវាធ្វើដំណើរឆ្លងកាត់ដែនទឹកនៅជិតប្រទេសអ៊ីរ៉ង់ ប៉ុន្តែមន្ត្រីការពារជាតិសហរដ្ឋអាមេរិក បាននិយាយថា អន្តរកម្មនេះមានសុវត្ថិភាពនិងដោយវិជ្ជាជីវៈ ហើយពុំមានផលប៉ះពាល់អ្វីដល់បេសកកម្មរបស់ខ្លួនឡើយ។

ប្រព័ន្ធផ្សព្វផ្សាយរដ្ឋអ៊ីរ៉ង់ បានចេញផ្សាយរូបភាពពីឧទ្ធម្ភាគចក្រនៃនាវាពិឃាតបំពាក់ដោយមីស៊ីលនាំមុខ USS Fitzgerald។ សមាជិកនាវិកម្នាក់ អាចត្រូវបានគេស្តាប់ឮចេញផ្សាយនូវអ្វីដែលទំនងជាការព្រមានតាមវិទ្យុទាក់ទងដល់នាវាចម្បាំងសហរដ្ឋអាមេរិកឱ្យផ្លាស់ប្តូរទិសដៅ ដោយនិយាយថានាវាកំពុងខិតជិតដល់ដែនទឹករបស់អ៊ីរ៉ង់។

ឧបទ្ទវហេតុនេះ បានកើតឡើងបន្ទាប់ពីការវាយប្រហាររបស់សហរដ្ឋអាមេរិកកាលពីខែមុន ទៅលើរោងចក្រនុយក្លេអ៊ែរអ៊ីរ៉ង់ ដែលទីក្រុងវ៉ាស៊ីនតោន និយាយថាជាផ្នែកមួយនៃកម្មវិធីដែលផ្តោតលើការអភិវឌ្ឍអាវុធនុយក្លេអ៊ែរ។ ទីក្រុងតេអេរ៉ង់ អះអាងថា កម្មវិធីនុយក្លេអ៊ែររបស់ខ្លួន គឺសម្រាប់តែគោលបំណងស៊ីវិលសុទ្ធសាធ។