អតីតនាយករដ្ឋមន្ត្រីអូស្ត្រាលី លោក Scott Morrison ដែលផ្តល់សក្ខីកម្ម នៅឯកិច្ចប្រជុំរបស់ក្រុមប្រឹក្សាសភាអាមេរិក អំពីការទប់ទល់ជាមួយចិន បានជំរុញឲ្យសហរដ្ឋអាមេរិក «បង្កើនទ្វេដង» លើការចូលរួមផ្នែកសេដ្ឋកិច្ចរបស់ខ្លួន នៅតំបន់ឥណ្ឌូប៉ាស៊ីហ្វិកដែលទីក្រុងប៉េកាំងកំពុងប្រឹងប្រែងមានឥទ្ធិពល។

អំឡុងពេលនិយាយ កាលពីថ្ងៃពុធ (ទី២៣ ខែកក្កដា) លោក Morrison បានលើកឡើងថា សន្តិសុខសេដ្ឋកិច្ច គឺជាការផ្តោតលើសន្តិសុខសំខាន់បំផុតរបស់ប្រទេសជាច្រើន នៅអាស៊ីអាគ្នេយ៍ ហើយភាពជាអ្នកដឹកនាំរបស់សហរដ្ឋអាមេរិក លើបញ្ហាសេដ្ឋកិច្ច និងការវិនិយោគរបស់លោកខាងលិច ផ្តល់ជម្រើសដល់តំបន់។

លោកបានបញ្ជាក់ថា៖ «នៅពេលដែលប្រទេសចិនមានភាពសកម្មនៅក្នុងប្រទេសជាក់លាក់មួយ ការឆ្លើយតប មិនមែនតម្រូវឲ្យសហរដ្ឋអាមេរិក ឬការគាំទ្រពីសម្ព័ន្ធមិត្តផ្សេងទៀត ចាកចេញពីទីនោះទេ ផ្ទុយទៅវិញ ការឆ្លើយតបត្រូវបង្កើនទ្វេដង ហើយបង្ហាញវត្តមាននៅទីនោះឲ្យកាន់តែខ្លាំងក្លា ដើម្បីផ្តល់ជម្រើសឲ្យពួកគេ»។

គួរបញ្ជាក់ថា លោក Morrison ត្រូវបានអញ្ជើញឲ្យទៅនិយាយទៅកាន់គណៈកម្មាធិការពិសេស ស្ដីពីការប្រកួតប្រជែងយុទ្ធសាស្ត្រ រវាងសហរដ្ឋអាមេរិក និងបក្សកុម្មុយនីស្តចិន អំពីបទពិសោធន៍របស់រដ្ឋាភិបាលរបស់លោក ពាក់ព័ន្ធនឹងប្រទេសចិនដែលដាក់ទណ្ឌកម្មពាណិជ្ជកម្មក្រៅផ្លូវការចំនួន ២០ពាន់លានដុល្លារ បន្ទាប់ពីអូស្ត្រាលីបានអំពាវនាវឲ្យមានការស៊ើបអង្កេតអំពីប្រភពដើមនៃជំងឺរាតត្បាតកូវីដ-១៩ ក្នុងឆ្នាំ២០២០។

ទណ្ឌកម្មត្រូវបានលុបចោលដោយទីក្រុងប៉េកាំង បន្ទាប់ពីលោក Morrison បានចាញ់ការបោះឆ្នោតជាតិ ក្នុងឆ្នាំ២០២២ ហើយរដ្ឋាភិបាលរបស់លោក Anthony Albanese បានស្វែងរកស្ថិរភាពទំនាក់ទំនងជាមួយដៃគូពាណិជ្ជកម្មដ៏ធំបំផុតរបស់ប្រទេសអូស្ត្រាលី៕