​វាយ​កូន​បាល់៖ ​តុលាការ​ទីក្រុង Melbourne ប្រទេស​អូស្ត្រាលី​បានសំរេច​កាត់ក្តី​ឱ្យ​កីឡាករ​វាយ​កូន​បាល់​លេខ ១ ពិភពលោក Novak Djokovic ចាក​ចេញពី​ការឃាត់ខ្លួន​នៅ​សណ្ឋាគា និង​ផ្តល់​ទិដ្ឋាការ​ត្រលប់​មកវិញ​។ Novak Djokovic ត្រូវបាន​បដិសេធ​មិនឱ្យ​ចូល​ប្រទេស​អូស្ត្រាលី ហើយ​ត្រូវបាន​លុបចោល​ទិដ្ឋាការបន្ទាប់ពី​បានមក​ដល់ទី​ក្រុង Melbourne កាលពី​ល្ងាច​ថ្ងៃ​ពុធ​សប្តាហ៍​មុនដើម្បី​ការពារ​តំណែងជើងឯក​របស់ខ្លួន​នៅ​ព្រឹត្តិការណ៍ Grand Slam, Australian Open​។​

​​កងកម្លាំង​អន្តោប្រវេសន៍​អូស្ត្រាលី​បាន​ចោទប្រកាន់ថា កីឡាករ​វាយ​កូន​បាល់​សញ្ជាតិ​ស៊ែ​ប​រូបនេះ​បានផ្តល់​ឯកសារ​មិន​គ្រប់គ្រាន់ តម្រូវ​តាម​ការចង់បាន​ក្នុង​ការចូល​មកកាន់​ទឹកដី​អូស្ត្រាលី និង​ពាក់ព័ន្ធ​ជាមួយនឹង​ឯកសារ​ចាក់​វ៉ាក់សាំង​ផងដែរ​។​ ​​Novak Djokovic ត្រូវបាន​ឃាត់ខ្លួន​ឱ្យ​មន្ត្រី​អន្តោប្រវេសន៍ និង​ឱ្យ​ស្នាក់​នៅក្នុង​សណ្ឋាគារ​ក្នុង​អាកាសយានដ្ឋាន​ទីក្រុង Melbourne រហូតដល់​ថ្ងៃ​សំរេច​ក្តី​ថ្ងៃ​ចន្ទ​ម្សិល​មិញ​នេះ​។​ ​​តុលាការ​បានសំរេច​ឱ្យ Djokovic ឈ្នះ​រឿងក្តី​នេះ​ដោយ​ថា នគរបាល​អន្តោប្រវេសន៍​មិនបាន​ផ្តល់​ពេលវេលា​គ្រប់គ្រាន់​ដល់ Djokovic ក្នុងការ​ឆ្លើយតប​ចំពោះ​ឯកសារ​ដែល​មិន​គ្រប់គ្រាន់​របស់គាត់​។

​​សូមបញ្ជាក់ថា ​ព្រឹត្តិការណ៍ Grand Slam, Australian Open នឹង​ចាប់ផ្តើម​នៅ​ថ្ងៃទី១៧ ខែមករា​ដើម​សប្តាហ៍​ក្រោយនេះ​ហើយ ​ខណៈ Novak Djokovic កំពុង​សំឡឹង​ស្វែងរក​ជើងឯក Grand Slam មួយទៀត​ដើម្បី​កាន់​កំណត់ត្រា​អ្នកឈ្នះ Grand Slam ច្រើនជាងគេ ខណៈដែល​បច្ចុប្បន្ននេះ​កីឡាករ​ ៣រូប​កំពុង​មានពាន Grand Slam ក្នុង​ដៃ ២០លើក​ដូចគ្នា​រួមមាន Novak Djokovic, Roger Federer និង Rafael Nadal៕

​អត្ថបទ​៖​នាង សុភា​វុ​ធ