រដ្ឋមន្រ្តីការបរទេសសហរដ្ឋអាមេរិកលោក Marco Rubio និយាយនៅថ្ងៃព្រហស្បតិ៍នេះថា លោកសូមធ្វើការច្រានចោលផែនការរបស់ប្រធានាធិបតីបារាំងលោក Emmanuel Macron ដើម្បីទទួលស្គាល់រដ្ឋប៉ាឡេស្ទីន ក្នុងនោះមន្រ្តីការទូតជាន់ខ្ពស់របស់សហរដ្ឋអាមេរិករូបនេះ បានចាត់ទុកវាជា “ការសម្រេចចិត្តធ្វេសប្រហែស” ។

លោក Macron និយាយកាលពីថ្ងៃព្រហស្បតិ៍ថា បារាំងមានបំណងទទួលស្គាល់រដ្ឋប៉ាឡេស្ទីននៅខែកញ្ញានៅមហាសន្និបាតអង្គការសហប្រជាជាតិ(UN) ហើយលោកសង្ឃឹមថានឹងជួយនាំសន្តិភាពមកកាន់តំបន់មជ្ឈិមបូព៌ា ។

នៅក្នុងលិខិតមួយច្បាប់ផ្ញើទៅកាន់ប្រធានអាជ្ញាធរប៉ាឡេស្ទីន លោក Mahmoud Abbas និងបានបង្ហោះនៅលើបណ្តាញផ្សព្វផ្សាយសង្គម លោក Macron បានបញ្ជាក់ពីការសម្រេចចិត្តរបស់ប្រទេសបារាំង និងបាននិយាយថា ខ្លួននឹងជំរុញទឹកចិត្តដល់ប្រទេសផ្សេងទៀតឲ្យធ្វើតាម ។ 

លោក Macron បញ្ជាក់ទៀតថា ជាការពិតចំពោះការប្តេជ្ញាចិត្តជាប្រវត្តិសាស្ត្ររបស់ខ្លួនសម្រាប់សន្តិភាពដ៏ត្រឹមត្រូវ និងយូរអង្វែងនៅមជ្ឈិមបូព៌ា លោកបានសម្រេចថា ប្រទេសបារាំងនឹងទទួលស្គាល់រដ្ឋប៉ាឡេស្ទីន ។ 

លោកបន្តថា លោកនឹងធ្វើសេចក្តីប្រកាសបែបនេះនៅឯមហាសន្និបាត UNនាខែកញ្ញាខាងមុខ ។ ប្រទេសបារាំង នឹងក្លាយជាប្រទេសលោកខាងលិចដ៏សំខាន់ដំបូងគេដែលទទួលស្គាល់ជាផ្លូវការនូវរដ្ឋប៉ាឡេស្ទីន ។

ទោះបីជាយ៉ាងណាក៏ដោយ លោក Rubio និយាយនៅក្នុងសារបង្ហោះនៅលើបណ្តាញព័ត៌មានសង្គម Xថា ការសម្រេចចិត្តធ្វេសប្រហែសបែបនេះ មានតែបម្រើឃោសនារបស់ក្រុមហាម៉ាស និងរារាំងលែងឲ្យមានសន្តិភាពប៉ុណ្ណោះ ។

ដោយឡែក ឯកអគ្គរដ្ឋទូតទីក្រុងវ៉ាស៊ីនតោនប្រចាំនៅអ៊ីស្រាអែលលោក Mike Huckabee បាននិយាយកាលពីខែមិថុនាថា លោកពុំគិតរដ្ឋឯករាជ្យប៉ាឡេស្ទីននៅតែជាគោលដៅនយោបាយបរទេសសហរដ្ឋអាមេរិកនោះឡើយ ៕