វិទ្យាស្ថាន សម្រាប់ការសិក្សាស្រាវជ្រាវ អំពីសង្គ្រាម បានឲ្យដឹងថា វិមានក្រឹមឡាំងកំពុងឆ្លៀតទាញយកផលពីការទាស់ចិត្ត នៅអ៊ុយក្រែន ចំពោះចំណាត់ការរបស់សភារបស់ប្រទេសនេះ ក្នុងការដាក់ក្រុមឃ្លាំមើលប្រឆាំងអំពើពុករលួយឲ្យស្ថិតនៅក្រោមការគ្រប់គ្រងរបស់អគ្គរដ្ឋអាជ្ញា។

ការវាយតម្លៃរបស់វិទ្យាស្ថានស្រាវជ្រាវនេះ ធ្វើឡើងបន្ទាប់ពីផ្ទុះការតវ៉ាដែលបង្កឡើងដោយសារការបារម្ភ ដែលថា ការិយាល័យប្រឆាំងអំពើពុករលួយជាតិ (NABU) និងការិយាល័យរដ្ឋអាជ្ញាប្រឆាំងអំពើពុករលួយពិសេស (SAPO) របស់អ៊ុយក្រែន នឹងមិនអាចដំណើរការដោយឯករាជ្យ ដើម្បីប្រយុទ្ធប្រឆាំងនឹងអំពើពុករលួយបានទៀតឡើយ។

អ្នកវិភាគអ៊ុយក្រែន បានប្រាប់សារព័ត៌មាន Newsweek ថា ចំណាត់ការនេះបំផ្លាញភាពជឿនលឿននៃលទ្ធិប្រជាធិបតេយ្យរយៈពេល ១ទសវត្សរ៍ ទោះបីជាលោកប្រធានាធិបតី Volodymyr Zelensky បាននិយាយកាលពីថ្ងៃព្រហស្បតិ៍ (ទី២៤ ខែកក្កដា) ថា លោកបានគាំទ្រសេចក្តីព្រាងច្បាប់ថ្មីដែលមានគោលបំណងពង្រឹងឯករាជ្យភាពនៃស្ថាប័នប្រឆាំងអំពើពុករលួយក៏ដោយ។

ការតវ៉ាបានផ្ទុះឡើងទូទាំងប្រទេស បន្ទាប់ពីលោក Zelensky បានចុះហត្ថលេខាលើសេចក្ដីស្នើច្បាប់ កាលពីថ្ងៃអង្គារ ដែលអ្នករិះគន់បានថ្កោលទោសថា បានបំផ្លាញឯករាជ្យភាពរបស់ NABU និង SAPO ជាចំណាត់ការមួយដែលប្រធានាធិបតីអ៊ុយក្រែន បាននិយាយថា មានគោលបំណងកាត់បន្ថយឥទ្ធិពលរបស់រុស្ស៊ី។

ទោះបីជាពួកគេមិនមែនធ្វើបាតុកម្មប្រឆាំងសង្គ្រាមក៏ដោយ ក៏សមាជិកសភារុស្ស៊ី និងអ្នកគាំទ្រវិមានក្រឹមឡាំង បានអះអាងថា ប្រជាជនអ៊ុយក្រែនដែលតវ៉ានឹងច្បាប់នេះ កំពុងប្រឆាំងនឹងការបន្តធ្វើសង្គ្រាម គឺរដ្ឋាភិបាលនៅទីក្រុងគីវ និងលោក Zelensky ផ្ទាល់។

វិទ្យាស្ថានស្រាវជ្រាវនេះ ក៏បានឲ្យដឹងផងដែរថា វិមានក្រឹមឡាំងទំនងជានឹងប្រើការតវ៉ានេះ ដើម្បីព្យាយាមបំបែកអ៊ុយក្រែនពីសម្ព័ន្ធមិត្តរបស់ខ្លួន ថោយសង្ឃឹមធ្វើឲ្យយោធារបស់ប្រទេសនេះចុះខ្សោយ៕