វិទ្យុកងទ័ពអ៊ីស្រាអែល ដែលបានដកស្រង់សម្តីមន្ត្រីយោធា បានឲ្យដឹងថា អ៊ីស្រាអែលនឹងអនុញ្ញាតឲ្យប្រទេសបរទេស ទម្លាក់ជំនួយតាមឆ័ត្រយោងចូលតំបន់ហ្កាហ្សា ចាប់ពីថ្ងៃសុក្រ (ទី២៥ ខែកក្កដា) នេះ។

អ្នកនាំពាក្យយោធាអ៊ីស្រាអែល មិនបានឆ្លើយតបភ្លាមៗនោះឡើយ ចំពោះសំណើរបស់ទីភ្នាក់ងារសារព័ត៌មាន Reuters ដើម្បីសុំការអត្ថាធិប្បាយ ជុំវិញរបាយការណ៍នេះ។

ក្រសួងសុខាភិបាលតំបន់ហ្កាហ្សា លើកឡើងថា មនុស្សជាង ១០០នាក់ បានស្លាប់ដោយសារតែភាពអត់ឃ្លាន នៅក្នុងដែនដីប៉ាឡេស្ទីន ចាប់តាំងពីអ៊ីស្រាអែលបានកាត់ផ្ដាច់ការផ្គត់ផ្គង់ ក្នុងខែមីនា។

អ៊ីស្រាអែល ដែលបានធ្វើសង្រ្គាមជាមួយក្រុមសកម្មប្រយុទ្ធហាម៉ាសប៉ាឡេស្ទីន នៅតំបន់ហ្កាហ្សា ចាប់តាំងពីខែតុលា ឆ្នាំ២០២៣ បានលុបចោលការរាំងខ្ទប់នោះ កាលពីខែឧសភា ប៉ុន្តែមានការរឹតបន្តឹងនៅកន្លែងដែលខ្លួននិយាយថា គឺចាំបាច់ ដើម្បីរារាំងជំនួយកុំឲ្យក្រុមសកម្មប្រយុទ្ធយកទៅប្រើប្រាស់។

ក្នុងរយៈពេល ២សប្តាហ៍ដំបូងនៃខែកក្កដានេះ ទីភ្នាក់ងារកុមាររបស់អង្គការសហប្រជាជាតិ គឺ UNICEF បានព្យាបាលកុមារចំនួន ៥.០០០នាក់ ដែលកំពុងប្រឈមនឹងកង្វះអាហារូបត្ថម្ភធ្ងន់ធ្ងរ នៅតំបន់ហ្កាហ្សា។

ប្រមុខអង្គការសុខភាពពិភពលោក (WHO) លោក Tedros Adhanom Ghebreyesus បាននិយាយកាលពីថ្ងៃពុធថា តំបន់ហ្កាហ្សាកំពុងជួបប្រទះនឹងភាពអត់ឃ្លានធ្ងន់ធ្ងរបង្កឡើងដោយសា្នដៃមនុស្ស ដែលបណ្តាលមកពីការរាំងខ្ទប់ជំនួយមិនឲ្យចូលទៅក្នុងតំបន់នោះ៕