​​ប្រណាំង​រថយន្ត​៖ ​កីឡាករ​ប្រណាំង​រថយន្ត​ស៊ុយអែត Mattias Ekstrom បាន​ប្រជែង​ឈ្នះ​ដំណាក់កាល​ទី៨ នៃ​ការប្រកួតប្រណាំងយានយន្ត Dakar Rally ថ្ងៃ​ចន្ទ​ម្សិលមិញ​ ខណៈ Nasser Al-Attiyah បន្ត​នាំមុខ​រួម​ដដែល​។

​​ដំណាក់កាល​ទី៨ ដែលមាន​ចំងាយ​ផ្លូវ ៣៩៥គីឡូម៉ែត្រ​កីឡាករ​ដែល​បើក​បររថ​យន្ត Audi, Mattias Ekstrom បានមក​ដល់ទី​ចំណាយពេល ៣ម៉ោង ៤២នាទី ២១វិនាទី​តាម​ពីក្រោយ​ដោយ​កីឡាករ​បារាំង Stephane Peterhansel យឺត​ជាង ៤៩វិនាទី និង​លេខ៣ កីឡាករ​បារាំង​មួយរូប​ទៀត Sebastien Loeb យឺត​ជាង ៣នាទី ៨វិនាទី​។ ​​ក្រោយ ៨ដំណាក់កាល​ផ្នែក​រថយន្ត​នេះ​កីឡាករ​ដែល​បើក​បររថ​យន្ត​តូយ៉ូតា Nasser Al-Attiyah នៅតែ​បន្ត​នាំមុខ​រួម​ដដែល​ដោយមាន​វេលា​ចំណេញ​ល្អ​ជាង​អ្នក​លេខ២ Sebastien Loeb ជាង​កន្លះ​ម៉ោង និង​លេខ៣ កីឡាករ​ម្ចាស់ផ្ទះ​អារ៉ាប៊ីសាអ៊ូឌីត Yazeed Al-Rajhi យឺត​ជាង​ជិត​មួយ​ម៉ោង​។

​​ងាក​មក​ការប្រកួត​ផ្នែក​ម៉ូតូ​វិញ​កីឡាករ​បារាំង Alexandre Giroud បាន​យកឈ្នះ​ដំណាក់កាល​ទី៨ នេះ និង​ឡើងមក​នាំមុខគេ​ដែរ​ក្នុង​តារាង​វេលា​រួម​។ ​​សំរាប់​ដំណាក់កាល​ទី៩ ថ្ងៃនេះ​មាន​ចំងាយ​ផ្លូវ ២៨៧គីឡូម៉ែត្រ​ ខណៈ​ការប្រកួត​នឹង​បញ្ចប់​នៅ​ថ្ងៃ​សុក្រ​នេះហើយ​ត្រឹម​ដំណាក់កាល​ទី១២ នៅ​រដ្ឋធានី Jeddah៕

​អត្ថបទ​៖​នាង សុភា​វុ​ធ