ចំហេះព្រៃដែលបានលេបត្របាក់ផ្នែកជាច្រើននៅទួរគី អស់រយៈពេលជាច្រើនសប្តាហ៍មកនេះ បានបន្តគំរាមកំហែងដល់ទីក្រុងធំបំផុតទីបួនរបស់ប្រទេសគឺទីក្រុង Bursa គិតត្រឹមព្រឹកថ្ងៃអាទិត្យ (២៧ កក្កដា) បណ្តាលឱ្យមនុស្សម្នារាប់រយនាក់ត្រូវបង្ខំចិត្តភៀសខ្លួនចេញពីផ្ទះសម្បែងរបស់ពួកគេ។

ចំហេះពេញមួយយប់លើព្រៃភ្នំជុំវិញក្រុង Bursa នៅភាគពាយព្យទួរគី បានរីករាលដាលយ៉ាងឆាប់រហ័ស ដោយពន្លឺពណ៌ក្រហមច្រាលគ្របដណ្ដប់ផ្ទៃមេឃពេលយប់ នៅជាយភាគខាងកើតក្រុង។

ការិយាល័យអភិបាលក្រុង Bursa បាននិយាយក្នុងសេចក្តីថ្លែងការណ៍មួយនាថ្ងៃអាទិត្យនេះថា មនុស្សប្រមាណជិត ១.៨០០នាក់ ត្រូវបានជម្លៀសដោយសុវត្ថិភាពពីភូមិនានាទៅភាគឦសាន ខណៈក្រុមពន្លត់អគ្គិភ័យជាង ១.១០០នាក់ បន្តទប់ស្កាត់អណ្តាតភ្លើង។ ផ្លូវហាយវ៉េដែលតភ្ជាប់ទីក្រុង Bursa ទៅកាន់រដ្ឋធានីអង់ការ៉ា ត្រូវបានបិទ ខណៈព្រៃឈើជុំវិញនោះត្រូវដុតបំផ្លាញខ្ទេចខ្ទី។

គិតត្រឹមព្រឹកថ្ងៃអាទិត្យដដែលនេះ ខ្យល់បក់មិនសូវខ្លាំងបាននាំមកនូវភាពធូរស្បើយខ្លះដល់ក្រុមពន្លត់អគ្គិភ័យ ដែលបានបន្តខិតខំប្រឹងប្រែងរបស់ខ្លួន តែទោះយ៉ាងនេះក្ដី វីដេអូទូរទស្សន៍ទួរគីបានបង្ហាញឱ្យឃើញពីទេសភាពពោរពេញដោយកម្ទេចកម្ទីផេះផង់ពីតំបន់ភ្នំ ជាទីដែលធ្លាប់មានកសិដ្ឋាន និងព្រៃស្រល់យ៉ាងស្រស់ស្អាតពីមុន។ គួរបញ្ជាក់ថា ទួរគីបានរងការវាយប្រហារដោយចំហេះព្រៃជារៀងរាល់ថ្ងៃ ចាប់តាំងពីចុងខែមិថុនា៕