រដ្ឋមន្ត្រីការបរទេសសហរដ្ឋអាមេរិក លោក Marco Rubio បានលើកឡើងថា ក្រុមមន្ត្រីក្រសួងការបរទេសរបស់សហរដ្ឋអាមេរិក កំពុងតែស្ថិតនៅក្នុងប្រទេសម៉ាឡេស៊ី ដើម្បីជួយដល់កិច្ចខិតខំប្រឹងប្រែងសន្តិភាព ខណៈភាគីកម្ពុជា និងថៃ គ្រោងនឹងចាប់ផ្តើមកិច្ចពិភាក្សានៅទីនោះនាថ្ងៃចន្ទ ២៨ កក្កដា នេះ ដើម្បីស្វះស្វែងរកក្ដីសង្ឃឹមសម្រាប់បទឈប់បាញ់ក្នុងជម្លោះព្រំដែន ដែលភាគីថៃបានបង្កឡើង។

លោក Rubio បាននិយាយក្នុងសេចក្តីថ្លែងការណ៍ដែលចេញផ្សាយដោយក្រសួងការបរទេសអាមេរិកកាលពីល្ងាចថ្ងៃអាទិត្យ ម៉ោងនៅសហរដ្ឋអាមេរិក និងនៅព្រឹកថ្ងៃចន្ទ ២៨ កក្កដា នេះ ម៉ោងនៅតំបន់អាស៊ីថា លោកប្រធានាធិបតីអាមេរិក Donald Trump និងប្រមុខការបរទេស Rubio បានទាក់ទងជាមួយសមភាគីនៃប្រទេសនីមួយៗ ហើយកំពុងតាមដានស្ថានការណ៍យ៉ាងជិតស្និទ្ធបំផុត។

ក្នុងសេចក្ដីថ្លែងការណ៍នោះ លោក Rubio លើកឡើងថា៖ "យើងចង់ឱ្យជម្លោះនេះបញ្ចប់ឱ្យបានឆាប់តាមដែលអាចធ្វើទៅបាន។ ក្រុមមន្រ្តីក្រសួងការបរទេសអាមេរិក កំពុងស្ថិតនៅក្នុងប្រទេសម៉ាឡេស៊ី ដើម្បីជួយដល់កិច្ចខិតខំប្រឹងប្រែងសន្តិភាពទាំងនេះ"។

លោក Trump បាននិយាយកាលពីថ្ងៃអាទិត្យថា លោកជឿជាក់ថាទាំងប្រទេសកម្ពុជា និងថៃ ចង់ដោះស្រាយការខ្វែងគំនិតគ្នានេះ បន្ទាប់ពីលោកបានប្រាប់មេដឹកនាំនៃប្រទេសទាំងពីរថាលោកនឹងមិនសម្រេចកិច្ចព្រមព្រៀងពាណិជ្ជកម្មនោះឡើយ លុះត្រាតែការប្រយុទ្ធត្រូវបានបញ្ចប់៕