សហរដ្ឋអាមេរិក បានសម្រេចកិច្ចព្រមព្រៀងពាណិជ្ជកម្មក្របខណ្ឌមួយជាមួយសហភាពអឺរ៉ុប កាលពីថ្ងៃអាទិត្យ (២៧ កក្កដា) ដោយការបន្ទាបពន្ធនាំចូលមកត្រឹម ១៥% លើទំនិញភាគច្រើនរបស់សហភាពអឺរ៉ុប - ថយចុះពាក់កណ្តាលនៃអត្រាការគំរាមកំហែង ៣០% ពីមុន - និងបញ្ចៀសសង្គ្រាមពាណិជ្ជកម្មកាន់តែធំរវាងសម្ព័ន្ធមិត្តទាំងពីរ ដែលមានចំនួនជិតមួយភាគបីនៃពាណិជ្ជកម្មពិភពលោក។

ប្រធានាធិបតីសហរដ្ឋអាមេរិក លោក Donald Trump និងប្រធានគណៈកម្មការអឺរ៉ុប លោកស្រី Ursula von der Leyen បានប្រកាសពីកិច្ចព្រមព្រៀងនេះ នៅឯទីលានវាយកូនហ្គោលដ៏ប្រណីតរបស់លោក Trump នៅភាគខាងលិចដែនដីស្កុតឡែន របស់ចក្រភពអង់គ្លេស បន្ទាប់ពីកិច្ចប្រជុំរយៈពេល ១ម៉ោងដែលបានជំរុញឱ្យមានកិច្ចព្រមព្រៀងពាណិជ្ជកម្មដ៏សំខាន់ បន្ទាប់ពីការចរចាអស់ជាច្រើនខែ។

លោក Trump ប្រាប់អ្នកយកព័ត៌មានថា "លោកគិតថានេះគឺជាកិច្ចព្រមព្រៀងដ៏ធំបំផុតមិនធ្លាប់មាន" ដោយសាទរចំពោះគម្រោងវិនិយោគរបស់ប្លុកអឺរ៉ុបចំនួន ៦០០ពាន់លានដុល្លារ នៅក្នុងសហរដ្ឋអាមេរិក និងបង្កើនការទិញថាមពល និងគ្រឿងយុទ្ធោករណ៍យោធារបស់ទីក្រុងវ៉ាស៊ីនតោនកាន់តែច្រើន។ ដោយពណ៌នាលោក Trump ថាជាអ្នកចរចាដ៏ស្វិតស្វាញ លោកស្រី Von der Leyen បាននិយាយថា ពន្ធ ១៥% នេះត្រូវអនុវត្ត "ទូលំទូលាយ" ហើយក្រោយមកប្រាប់អ្នកសារព័ត៌មានថា អត្រាថ្មីនេះគឺ "ល្អបំផុតដែលអឺរ៉ុបអាចទទួលបាន"។

ខណៈពន្ធថ្មីនេះអនុវត្តចំពោះទំនិញភាគច្រើន រួមទាំងឧបករណ៍អេឡិចត្រូនិក និងឱសថ តែក៏មានករណីលើកលែងដែរ ដោយសហរដ្ឋអាមេរិកនឹងរក្សាការដំឡើងពន្ធ ៥០% លើដែកថែប និងអាលុយមីញ៉ូម។ ទោះយ៉ាងនេះក្ដី ពន្ធដែកថែប និងអាលុយមីញ៉ូមនេះនៅតែអាចធ្លាក់ចុះទៀតនៅពេលក្រោយ ដោយលោកស្រី Von der Leyen បានបង្ហើបថា ពន្ធនេះអាចត្រូវបានជំនួសដោយប្រព័ន្ធកូតាផ្សេងៗ៕