ប្រធានាធិបតីអាមេរិក លោក Donald Trump បាននិយាយកាលពីថ្ងៃអាទិត្យ (២៧ កក្កដា) ថា អ៊ីស្រាអែល នឹងត្រូវតែធ្វើការសម្រេចចិត្តឱ្យច្បាស់លើជំហានបន្ទាប់ស្ដីពីតំបន់ហ្កាហ្សា ដោយបន្ថែមថា លោកមិនដឹងឡើយថានឹងមានអ្វីកើតឡើងបន្ទាប់ទៀតទេក្រោយការដួលរលំនៃការចរចារបទឈប់បាញ់ និងដោះលែងចំណាប់ថ្នូរជាមួយក្រុមហាម៉ាស។

លោក Trump បានគូសបញ្ជាក់ពីសារៈសំខាន់នៃការធានាឱ្យបាននូវការដោះលែងចំណាប់ថ្នូរក្នុងដៃពួកសកម្មប្រយុទ្ធហាម៉ាសប៉ាឡេស្ទីន នៅក្នុងតំបន់ហ្កាហ្សា ដោយនិយាយថាចលនាហាម៉ាស ស្រាប់តែ "ប្រកាន់តឹង" ភ្លាមៗលើបញ្ហានេះ។ ទាក់ទងវិបត្តិភាពអត់ឃ្លាន លោក Trump សន្យាថា ក្រុងវ៉ាស៊ីនតោននឹងផ្តល់ជំនួយបន្ថែមទៀតដល់តំបន់ហ្កាហ្សា ដែលរងការបំផ្លិចបំផ្លាញក្នុងសង្រ្គាមអស់ជាច្រើនខែ។

លោក Trump បាននិយាយថា "រូបលោកដឹងពីអ្វីដែលលោកនឹងធ្វើ ប៉ុន្តែមិនទាន់បញ្ចេញបានទេនៅពេលនេះ ដោយអ៊ីស្រាអែលនឹងត្រូវតែធ្វើការសម្រេចចិត្ត"។ ប្រធានាធិបតីរូបនេះក៏បានអះអាងដោយគ្មានភស្តុតាងថា ក្រុមហាម៉ាសកំពុងលួចស្បៀងអាហារដែលចូលទៅក្នុងហ្កាហ្សា ហើយលក់គ្រឿងផ្គត់ផ្គង់ទាំងនោះ។

នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយថា អ៊ីស្រាអែលឥឡូវនេះកំពុងពិចារណាជម្រើស "ជំនួសផ្សេងទៀត" ដើម្បីសម្រេចបាននូវគោលដៅរបស់ខ្លួនក្នុងការនាំយកចំណាប់ថ្នូរត្រឡប់ទៅវិញ និងបញ្ចប់ការគ្រប់គ្រងរបស់ក្រុមហាម៉ាសលើហ្កាហ្សា ជាទីដែលភាពអត់ឃ្លានកំពុងរីករាលដាល ហើយប្រជាជនភាគច្រើនគ្មានផ្ទះសម្បែង ស្របពេលមានការបំផ្លិចបំផ្លាញយ៉ាងទូលំទូលាយពីការវាយលុករបស់អ៊ីស្រាអែល៕