អ្នកនាំពាក្យវិមានក្រឹមឡាំង លោក Dmitry Peskov បាននិយាយកាលពីថ្ងៃអាទិត្យ (២៧ កក្កដា) ថា រុស្ស៊ីចង់ដោះស្រាយសង្រ្គាមរបស់ខ្លួននៅអ៊ុយក្រែន តាមរយៈ "មធ្យោបាយការទូត និងនយោបាយ" ប៉ុន្តែក៏ព្រមានថានឹងបន្តប្រតិបត្តិការយោធា រហូតដល់ "គោលដៅ" ការទាមទារអតិបរមារបស់ខ្លួនត្រូវបានសម្រេច។

ឆ្លើយតបទៅនឹងសំណួររបស់ទីភ្នាក់ងារសារព័ត៌មាន Tass គ្រប់គ្រងដោយរដ្ឋរុស្ស៊ី លោក Peskov បាននិយាយថា "គោលដៅនៃសង្គ្រាមត្រូវតែត្រូវបានបំពេញ មុនពេលគោលការណ៍នៃទំនាក់ទំនងនាពេលអនាគតជាមួយអ៊ុយក្រែន អាចកំណត់បាន"។

រុស្សី បន្តជំរុញការទាមទារស្នូលរបស់ខ្លួនជាច្រើនដូចដែលគូសបញ្ជាក់នៅពេលចាប់ផ្តើមប្រតិបត្តិការយោធាក្នុងឆ្នាំ២០២២ រួមមានដូចជា ការហាមប្រាមអ៊ុយក្រែនមិនឱ្យចូលអង្គការណាតូ ភាពគ្មានយោធាទ្រង់ទ្រាយធំរបស់អ៊ុយក្រែន រួមទាំងការទទួលស្គាល់តំបន់អ៊ុយក្រែនចំនួន៤ ថាជាទឹកដីរបស់រុស្ស៊ី រួមជាមួយនឹងឧបទ្វីបគ្រីម៉េ។ លោក Peskov អះអាងថា រុស្ស៊ី "ពេញចិត្ត" ដោះស្រាយជម្លោះតាមរយៈការសន្ទនាណាស់ ប៉ុន្តែថា ប្រតិបត្តិការយោធានៅតែបន្ត ដោយសារតែ "រាល់សំណើសម្រាប់កិច្ចសន្ទនាត្រូវច្រានចោល ទាំងដោយអ៊ុយក្រែន និងលោកខាងលិច"។

ការអត្ថាធិប្បាយនេះកើតឡើងប៉ុន្មានថ្ងៃប៉ុណ្ណោះបន្ទាប់ពីកិច្ចចរចាសន្តិភាពដោយផ្ទាល់ជុំទី៣ កាលពីសប្ដាហ៍មុននៅទួរគី រវាងភាគីជម្លោះទាំងពីរ ដោយបានមើលឃើញ រុស្ស៊ីនិងអ៊ុយក្រែន ព្រមព្រៀងដោះដូរឈ្លើយសឹកបន្ថែម ប៉ុន្តែហាក់ដូចជាមានការរីកចម្រើនតិចតួចណាស់លើលក្ខខណ្ឌបទឈប់បាញ់ ឬលទ្ធភាពនៃកិច្ចប្រជុំកំពូលរវាងមេដឹកនាំប្រទេសទាំងពីរ៕