មនុស្សយ៉ាងហោចណាស់៣៨នាក់បានស្លាប់ និង ១៥ នាក់ផ្សេងទៀតបានរងរបួសនៅក្នុងការវាយប្រហារលើព្រះវិហារមួយកន្លែងនៅភាគខាងកើតសាធារណរដ្ឋប្រជាធិបតេយ្យកុងហ្គោ (DRC)។ ការវាយប្រហារដែលធ្វើឡើងដោយសមាជិកកងកម្លាំងប្រជាធិបតេយ្យសម្ព័ន្ធមិត្តដែលសង្ស័យ (ADF) ប្រដាប់ដោយកាំភ្លើង និងកាំបិត បានកើតឡើងនៅព្រះវិហារក្នុងក្រុង Komanda ខេត្ត Ituri កាលពីថ្ងៃអាទិត្យ។

សមាជិកកងកម្លាំងប្រជាធិបតេយ្យសម្ព័ន្ធមិត្ត(ADF) ដែលមានទំនាក់ទំនងជាមួយក្រុមរដ្ឋអ៊ីស្លាម(ISIS) គឺជាក្រុមឧទ្ទាមធ្វើប្រតិបត្តិការនៅតំបន់ព្រំដែនរវាងប្រទេសអ៊ុយហ្គង់ដា និងប្រទេសកុងហ្គោ(DRC) ហើយបានធ្វើការវាយប្រហារជាប្រចាំលើជនស៊ីវិល។

លំនៅឋាន និងហាងទំនិញមួយចំនួនត្រូវបានអគ្គិភ័យឆាបឆេះ ហើយមនុស្សជាច្រើននៅបាត់ខ្លួន បន្ទាប់ពីការវាយប្រហារ ដែលបានកើតឡើងខណៈគ្រឹស្តបរិស័ទកាតូលិកកំពុងចូលរួមពិធីសាសនានៅព្រះវិហារ ដំណើរការដោយអង្គការសប្បុរសធម៌ Caritas ។

សកម្មជនសិទ្ធិមនុស្សដែលមានវត្តមាននៅកន្លែងកើតហេតុក្នុងទីក្រុង Komanda បាននិយាយថា «ក្រុមឧទ្ទាមភាគច្រើនបានវាយប្រហារទៅលើអ្នកកាន់សាសនាគ្រឹស្តដែលស្នាក់នៅពេលយប់នៅក្នុងព្រះវិហារកាតូលិក»។ «អ្នកទាំងនេះត្រូវបានសម្លាប់ដោយកាំបិត ឬគ្រាប់កាំភ្លើង»។