ប្រជាជននៅទីក្រុង Mexico City បានមកប្រមូលផ្តុំគ្នាកាលពីថ្ងៃអាទិត្យ (២៧ កក្កដា) នៅកណ្តាលទីក្រុង ដើម្បីគូរផ្ទាំងគំនូរឡើងវិញ ក្នុងការគាំទ្រដល់ពលរដ្ឋប៉ាឡេស្ទីនដែលស្ថិតក្រោមការហ៊ុមព័ទ្ធរបស់អ៊ីស្រាអែល។ យោងតាមក្រុមសកម្មជនបានឲ្យដឹងថា វាជាលើកទី៨ ឬទី៩ហើយ ដែលផ្ទាំងគំនូរមានទីតាំងនៅក្នុងរបងដែកដែលការពារវិមាន Juarez Hemicycle ត្រូវបានលាបពណ៌ចាប់តាំងពីការវាយលុករបស់យោធាអ៊ីស្រាអែលលើតំបន់ហ្កាហ្សាបានចាប់ផ្តើមនៅខែតុលា ឆ្នាំ២០២៣។

សមាជិកនៃវេទិកាអន្តរជាតិសម្រាប់សាមគ្គីភាពជាមួយបុព្វហេតុប៉ាឡេស្ទីន ដែលចូលរួមគូរផ្ទាំងគំនូរ លោកស្រី Alma Alvarado បាននិយាយថា ពលរដ្ឋប៉ាឡេស្ទីនកំពុងប្រឈមនឹង «ស្ថានភាពដ៏សោកសៅ»។ «មនុស្សជាច្រើនកំពុងស្លាប់ដោយភាពស្រេកឃ្លាន»។ ការអត្ថាធិប្បាយរបស់លោកស្រី ធ្វើឡើងមួយសប្តាហ៍បន្ទាប់ពីក្រុមផ្តល់ជំនួយ បាននិយាយថាមានភាពអត់ឃ្លានទ្រង់ទ្រាយធំក្នុងចំណោមប្រជាជន២,២លាននាក់នៅហ្កាហ្សា ហើយការព្រមានជាអន្តរជាតិអំពីស្ថានភាពមនុស្សធម៌បានកើនឡើង។

អង្គការសហប្រជាជាតិ បានប៉ាន់ប្រមាណថា កងកម្លាំងអ៊ីស្រាអែលបានសម្លាប់មនុស្សជាង ១.០០០នាក់ដែលកំពុងស្វែងរកការផ្គត់ផ្គង់ស្បៀង ភាគច្រើននៅជិតកន្លែងចែកចាយជំនួយយោធារបស់មូលនិធិមនុស្សធម៌ហ្កាហ្សា(Gaza Humanitarian Foundation) គាំទ្រដោយអ៊ីស្រាអែល និងសហរដ្ឋអាមេរិក។