ភាគហ៊ុនជុំវិញពិភពលោកបានកើនឡើង ហើយប្រាក់អឺរ៉ូក៏ឡើងថ្លៃនៅថ្ងៃចន្ទ (២៨ កក្កដា) នេះ បន្ទាប់ពីកិច្ចព្រមព្រៀងពាណិជ្ជកម្មរវាងសហរដ្ឋអាមេរិក និងប្លុកអឺរ៉ុប បានបង្កើនអារម្មណ៍ទីផ្សារ និងផ្តល់ភាពច្បាស់លាស់មួយចំនួនក្នុងកិច្ចប្រជុំគោលនយោបាយធនាគារកណ្តាលសំខាន់ៗ។

គួរឱ្យដឹងថា អាមេរិកសម្រេចកិច្ចព្រមព្រៀងពាណិជ្ជកម្មក្របខណ្ឌជាមួយសហភាពអឺរ៉ុប ដោយដាក់ពន្ធនាំចូល ១៥% លើទំនិញភាគច្រើនរបស់អឺរ៉ុប - ថយចុះពាក់កណ្តាលនៃអត្រាការគំរាម ៣០% ពីមុន។

ក្រោយការប្រកាសនេះ ភាគហ៊ុន S&P 500 របស់អាមេរិកឡើង ០,៤% ហើយហ៊ុន Nasdaq កើនបាន ០,៥% ខណៈប្រាក់អឺរ៉ូ បានរឹងមាំយ៉ាងទូលំទូលាយ ដោយកើនឡើងធៀបនឹងប្រាក់ដុល្លារ និងប្រាក់យ៉េន ចំណែកហ៊ុនរួមរបស់អឺរ៉ុប បានកើនឡើងជិត ១%។

នៅអាស៊ីវិញ សន្ទស្សន៍ធំបំផុតរបស់ MSCI នៃភាគហ៊ុនអាស៊ីប៉ាស៊ីហ្វិកខាងក្រៅប្រទេសជប៉ុន កើនឡើង ០,២៧% ជាអត្រាបន្តិចប៉ុណ្ណោះនៃកម្រិតខ្ពស់ជិត ៤ឆ្នាំដែលកើតមានកាលពីសប្តាហ៍មុន។ ដោយឡែក ផ្សារភាគហ៊ុន Nikkei របស់ជប៉ុន ធ្លាក់ចុះបន្តិច ០,៨% បន្ទាប់ពីឡើងដល់កម្រិតខ្ពស់រយៈពេល ១ឆ្នាំកាលពីសប្តាហ៍មុន។

កិច្ចព្រមព្រៀងអាមេរិក-អឺរ៉ុបនេះ បានផ្តល់ភាពច្បាស់លាស់កាន់តែខ្លាំងដល់ក្រុមហ៊ុនសកល និងបញ្ចៀសសង្គ្រាមពាណិជ្ជកម្មកាន់តែធំរវាងសម្ព័ន្ធមិត្តទាំងពីរ ដែលគ្របដណ្ដប់ស្មើនឹងជិតមួយភាគបីនៃពាណិជ្ជកម្មពិភពលោក៕