មនុស្សរាប់រយនាក់បានប្រមូលផ្តុំគ្នានៅខាងក្រៅសណ្ឋាគារមួយក្នុងទីក្រុង Epping នៅចក្រភពអង់គ្លេស កាលពីថ្ងៃអាទិត្យជាលើកទីប្រាំ ធ្វើបាតុកម្មជុំវិញបរិវេណដែលត្រូវបានប្រើសម្រាប់លំនៅដ្ឋានអ្នកស្វែងរកសិទ្ធិជ្រកកោន ខណៈការតវ៉ាប្រឆាំងបានរីករាលដាលដល់សណ្ឋាគារផ្សេងទៀតកាលពីចុងសប្តាហ៍។ នគរបាលនិយាយថា ជាមួយគ្នានោះ មនុស្ស៣នាក់ត្រូវបានចាប់ខ្លួន អំឡុងការប្រឈមដាក់គ្នាដ៏តានតឹង តែពុំមានផ្ទុះអំពើហិង្សាទេ។

វត្តមាននគរបាលដ៏ច្រើនដែលមានមន្ត្រីមកពីកងកម្លាំងជាច្រើនបានរឹតបន្តឹងទំនាក់ទំនងរវាងក្រុមអ្នកតវ៉ាប្រឆាំង និងគាំទ្រជនអន្តោប្រវេសន៍ ដោយសង្កាត់ Essex បាននិយាយថាការរឹតបន្តឹងគឺជាការចាំបាច់ បន្ទាប់ពីអ្វីដែលខ្លួនបានហៅថាជាការរំខានធ្ងន់ធ្ងរដដែលៗ អំពើហិង្សា និងគ្រោះថ្នាក់ដល់សហគមន៍ចាប់តាំងពីបាតុកម្មលើកដំបូងបានផ្ទុះឡើងកាលពីថ្ងៃទី ១៣ ខែកក្កដា។

អាជ្ញាធរសង្កាត់ Norfolk បាននិយាយថា បុរសពីរនាក់ត្រូវបានចោទប្រកាន់ពីបទល្មើសសណ្តាប់ធ្នាប់សាធារណៈបន្ទាប់ពីមានការតវ៉ាប្រឆាំងនឹងអន្តោប្រវេសន៍ប្រហែល ៤០០ នាក់ និងក្រុមអ្នកតវ៉ាគាំទ្រ ២៥០នាក់នៅខាងក្រៅសណ្ឋាគារមួយក្នុងទីក្រុង Diss កាលពីថ្ងៃសៅរ៍។ មានការតវ៉ាបន្ថែមទៀតនៅខាងក្រៅសណ្ឋាគារមួយនៅតំបន់ Canary Wharf ក្នុងទីក្រុងឡុងដ៍្រកាលពីថ្ងៃអាទិត្យ ដោយចំនួនអ្នកតវ៉ាមានតែប៉ុន្មានរយនាក់ ប៉ុណ្ណោះ ។

បាតុកម្មនៅទីក្រុង Epping ក្នុងតំបន់ Essex កាលពីថ្ងៃអាទិត្យ ដែលជាកន្លែងអ្នកតវ៉ាប្រឆាំងជនអន្តោប្រវេសន៍ ប្រមាណ ៥០០ នាក់បានប្រមូលផ្តុំគ្នានៅពីក្រោយរបាំងដែកនៅខាងក្រៅសណ្ឋាគារ Bell គឺជាបាតុកម្មចុងក្រោយបង្អស់ដែលបានចាប់ផ្តើមបន្ទាប់ពីអ្នកស្វែងរកសិទ្ធិជ្រកកោនម្នាក់ ឈ្មោះ Hadush Kebatu អាយុ ៤១ មកពីប្រទេសអេត្យូ ត្រូវបានចោទប្រកាន់ពីបទបៀតបៀនផ្លូវភេទ ចំពោះការប៉ុនប៉ងថើបក្មេងស្រីអាយុ១៤ឆ្នាំម្នាក់។ យ៉ាងណាបុរសនោះបានបដិសេធចំពោះបទល្មើសហើយកំពុងជាប់ឃុំ៕