វិមានក្រឹមឡាំង នៅថ្ងៃចន្ទ (ទី២៨ ខែកក្កដា) បានឲ្យដឹងថា ខ្លួនមិនបានច្រានចោលនោះឡើយ ជុំវិញលទ្ធភាពនៃការមានជំនួប រវាងប្រធានាធិបតីរុស្ស៊ីលោក Vladimir Putin និងប្រធានាធិបតីអាមេរិកលោក Donald Trump ក្នុងខែកញ្ញា នៅប្រទេសចិន។

លោក Putin គ្រោងនឹងធ្វើទស្សនកិច្ចនៅប្រទេសចិន នាដើមខែកញ្ញា ដើម្បីចូលរួមការប្រារព្ធខួបលើកទី៨០ នៃការបញ្ចប់សង្គ្រាមលោកលើកទី២។

អំឡុងនិយាយទៅកាន់អ្នកសារព័ត៌មាន ក្នុងនោះមានរួមទាំងសារព័ត៌មាន AFP ផងដែរ នៅឯសន្និសីទសារព័ត៌មាន អ្នកនាំពាក្យវិមានក្រឹមឡាំង លោក Dmitry Peskov បានប្រាប់ថា៖ «ប្រសិនបើទីបំផុត វាកើតឡើង ពោលគឺប្រធានាធិបតីអាមេរិក សម្រេចទៅធ្វើទស្សនកិច្ច នៅប្រទេសចិន ក្នុងអំឡុងប៉ុន្មានថ្ងៃនោះ ពិតណាស់ កិច្ចប្រជុំបែបនេះ មិនអាចត្រូវបានបដិសេធឡើយ»។

មន្ត្រីចិនបានឲ្យដឹងនៅក្នុងខែមិថុនាថា កងទ័ពចិន នឹងធ្វើព្យុហយាត្រាឆ្លងកាត់ទីលាន Tiananmen របស់ទីក្រុងប៉េកាំង រួមជាមួយនឹងការបង្ហាញនៃការហោះជាជួររបស់យន្តហោះ និងសព្វាវុធបច្ចេកវិទ្យាកម្រិតខ្ពស់ ដើម្បីប្រារព្ធខួប នៅថ្ងៃទី៣ ខែកញ្ញា។

វិមានក្រឹមឡាំងបានបញ្ជាក់ថា លោក Putin នឹងចូលរួមការប្រារព្ធពិធីនេះ ហើយមន្ត្រីចិន បានប្រាប់ថា មេដឹកនាំពិភពលោកផ្សេងទៀត ក៏ត្រូវបានរំពឹងនឹងមានវត្តមានផងដែរ៕