នាយករដ្ឋមន្រ្តីអ៊ីស្រាអែលលោក Benjamin Netanyahu និយាយថា គ្មានភាពអត់ឃ្លាននោះទេនៅតំបន់ហ្កាហ្សា ស្របពេលដែលអ៊ីស្រាអែលបានអនុញ្ញាតឲ្យមានជំនួយពេញមួយសង្រ្គាមនេះ ។

លោកនិយាយថា ពួកយើងជំរុញឲ្យមានបរិមាណជំនួយត្រូវការតាមច្បាប់អន្តរជាតិ មាននូវរថយន្តរាប់រយគ្រឿង ផ្ទុកដោយជំនួយរាប់តោន ។ មកទល់នឹងពេលនេះពួកយើងបានផ្គត់ផ្គង់ស្បៀងអាហារ ១,៩លានតោន ចាប់តាំងពីសង្រ្គាមផ្ទុះឡើង ជិត ២លានតោន ហើយឥឡូវ ពួកយើងមានរថយន្តរាប់រយគ្រឿង ដែលរង់ចាំនៅច្រកឆ្លងកាត់ព្រំដែន Kerem Shalom នៅខាងតំបន់ហ្កាហ្សា ។

កាលពីថ្ងៃអាទិត្យ អ៊ីស្រាអែល បានប្រកាសផ្អាកប្រតិបត្តិការសឹករយៈពេល ១០ម៉ោង ក្នុង ១ថ្ងៃ នៅតាមតំបន់ជាច្រើននៅហ្កាហ្សា ហើយនិងច្រករបៀងជំនួយថ្មី ស្របពេលដែលហ៊្សកដានី និងអារ៉ាប់រួម ទម្លាក់គ្រឿងផ្គត់ផ្គង់ពីលើអាកាសចូលទៅក្នុងដែនដីមួយនេះ ស្របពេលដែលរូបភាពពីការអត់ឃ្លានរបស់ជនប៉ាឡេស្ទីន បានធ្វើឲ្យពិភពលោកព្រួយបារម្ភ ។

អ៊ីស្រាអែលប្រឈមការរិះគន់អន្តរជាតិកើនឡើង ដែលរដ្ឋាភិបាលពួកគេច្រានចោល ជុំវិញវិបត្តិមនុស្សធ៌នៅតំបន់ហ្កាហ្សា ហើយនិងកិច្ចប្រជុំបទឈប់បាញ់ដោយប្រយោលនៅទីក្រុងដូហា រវាងអ៊ីស្រាអែល និងក្រុមជីវពលហាម៉ាស ពុំបានទម្លុះភាពទាល់ច្រក ។

អំឡុងដំណើរទស្សនកិច្ចនៅស្កុតលែន ប្រធានាធិបតីសហរដ្ឋអាមេរិកលោក Donald Trump បាននិយាយថា អ៊ីស្រាអែលត្រូវសម្រេចចិត្តលើជំហានបន្ទាប់របស់ខ្លួននៅហ្កាហ្សា ហើយលោកនិយាយថា លោកមិនដឹងថា នឹងមានអ្វីកើតឡើងនោះទេ ក្រោយការដួលរលំបទឈប់បាញ់ និងកិច្ចចរចាដោះលែងចំណាប់ថ្នូរជាមួយក្រុមហាម៉ាស ៕