(ភ្នំពេញ) អង្គការមនុស្សចាស់កម្ពុជា បានសហការជាមួយដៃគូ ក្នុងការរៀបចំសិក្ខា សាលាផ្សព្វផ្សាយអំពី “យន្តការសមាគមមនុស្សចាស់ និងអន្តរជំនាន់-ពហុមុខងារ ដើម្បីជីវិតថ្លៃថ្នូររបស់មនុស្សវ័យចាស់កម្ពុជា និងការអភិវឌ្ឍប្រកបដោយនិរន្តរភាព” តាមរយៈមូលនិធិគាំទ្រពីក្រសួងសហព័ន្ធសម្រាប់កិច្ចសហប្រតិបត្តិការសេដ្ឋកិច្ច និង អភិវឌ្ឍន៍ នៃប្រទេសអាល្លឺម៉ង់ (BMZ) នាថ្ងៃទី២៨ ខែ កក្កដា ឆ្នាំ២០២៥ នៅភោជនីយដ្ឋានទន្លេបាសាក់ ២ រាជធានីភ្នំពេញ ។

  សិក្ខាសាលានេះ រៀបចំឡើងក្នុងគោលបំណង ដើម្បីចែករំលែក និងផ្សព្វផ្សាយអំពីយន្តការសមាគមមនុស្ស ចាស់ឲ្យកាន់តែទូលំទូលាយ និងប្រមូលធាតុចូលបន្ថែមក្នុងការពង្រឹង និងពង្រីកយន្តការដែលមានស្រាប់នេះនៅទូទាំងប្រទេស សំដៅលើកកម្ពស់ស្ថានភាពរស់នៅ និងសុខុមាល ភាពរបស់មនុស្សចាស់ឆ្លើយតបទៅនឹងទិសដៅ និងគោល នយោបាយជាតិស្តីពីមនុស្សវ័យចាស់ឆ្នាំ ២០១៧-២០៣០ ។ សិក្ខាសាលាមានការអញ្ជើញចូលរួមពីថ្នាក់ដឹកនាំក្រសួងសង្គមកិច្ច អតីតយុទ្ធជន និង​យុវនីតិ សម្បទា (ស.អ.យ.) និងក្រសួង-ស្ថាប័នពាក់ព័ន្ធដែលជា សមាជិកគណៈកម្មា ធិ ការកម្ពុជាដើម្បីមនុស្សវ័យចាស់ ព្រមទាំងតំណាងមន្ទីរ ស.អ.យ. មកពី ១៥ រាជធានី-ខេត្ត ដៃគូអភិវឌ្ឍន៍ អង្គការសង្គមស៊ីវិល រួមទាំងតំណាងសមាគមមនុស្សចាស់មកពី ៩ រាជធានី-ខេត្ត នៃព្រះរាជាណាចក្រកម្ពុជា សរុបចំនួន ១២០នាក់។ 

   តាមរយៈកិច្ចសហការក្នុងការអនុវត្តគម្រោងរយៈពេលជាង ៣ឆ្នាំកន្លងមកនេះ គម្រោងសម្រេចបាននូវលទ្ធផលជា ច្រើន (ស្របតាមការរំពឹងទុក) ជាពិសេសទៅលើការ រៀបចំ និង ពង្រឹងសមាគមមនុស្សចាស់នៅក្នុងតំបន់គោលដៅឲ្យក្លាយជាសមាគមដែលមានលក្ខណៈអន្តរជំនាន់ សកម្ម និងពហុមុខងារប។ គម្រោងបានចូលរួមចំណែកក្នុងការជួយលើកកម្ពស់ស្ថានភាពរស់នៅ សុខភាព ប្រាក់ចំណូលសិទ្ធិ និងការចូលរួមរបស់មនុស្សវ័យចាស់ និងជនងាយរងគ្រោះផ្សេងទៀតនៅក្នុងសហគមន៍ប្រកបដោយបរិយាបន្ន័ និងនិរន្តរភាព។ សមិទ្ធិផលចម្បងៗរួមមាន៖ទី1. សមាគមនុស្សចាស់និងអន្តរជំនាន់ពហុមុខាងារចំនួន ១៥២ ដែលក្នុងនោះ សមាគមថ្មីចំនួន ៤២ ត្រូវបានបង្កើតឡើង និង សមាគម​ ១១០ ដែល​មានស្រាប់ទទួលបានការពង្រឹងសមត្ថភាពក្នុងការបំពេញមុខងារ ដោយបានជួយគាំទ្រ និងឆ្លើយតបទៅនឹងតម្រូវការរបស់សមាជិក និងមនុស្សវ័យចាស់នៅសហគមន៍ សរុបប្រមាណ ៣៦, ៧៣២នាក់។ ទី2. មនុស្សចាស់ និងសមាជិកសមាគមមនុស្សចាស់ (អន្តរជំនាន់ និង​ពហុមុខងារ) ចំនួនប្រមាណ ៣,៤៧៥នាក់ ដែលបានការគាំទ្រពីសកម្មភាពរកចំណូល និងមុខរបរចិញ្ចឹមជីវិត (តាមរយៈមូលនិធិទុនបង្វិល និង​វគ្គបណ្តុះបណ្តាលមុខរបរ ព្រមទាំងបានរាយការណ៍ពីការកើននូវចំណូលរបស់ពួកគាត់។ ទី3. មនុស្សចាស់ និងសមាជិកសមាគមចំនួន ៥,៣៣៨ នាក់ ដែលទទួលបានការអប់រំសុខភាពបឋម ​ពិនិត្យសុខភាព និងធ្វើលំហាត់ប្រាណជាប្រចាំ និងមនុស្សចាស់ចំនួន ៤១,៦៤៦ នាក់ ទទួលបានការអប់រំ និងយល់ដឹងអំពីការថែ ទាំសុខភាព ​​ក្នុងនោះមានមនុស្សចាស់ដែលជរាគ្មានទីពឹង ចំនួន ២៣៤នាក់ បានទទួលការថែទាំតាមផ្ទះ ពីអ្នកស្ម័គ្រ ចិត្តនៅតាមសហគមន៍របស់គាត់ផងដែរ។ និងទី4. សមាគមទាំង ១៥២ មានភាពអង់អាច និងមាន​ចំនួន ៦៨ បានទទួលបានការ​គិតគូរបន្ថែមពីអាជ្ញាធរមូលដ្ឋានតាម រយៈការផ្តល់មូលនិធិឃុំសង្កាត់ (សមាគម ៣០ឆ្នាំ២០២២, ៥៦ ឆ្នាំ២០២៣ និង ៦៨ ឆ្នាំ២០២៤) ដើម្បីប្រើប្រាស់ឆ្លើយ តបទៅនឹងតម្រូវការរបស់មនុស្សចាស់ និង​សមាជិករបស់ខ្លួន ។ សំខាន់ជាងនេះទៅទៀត គោលការណ៍​ណែនាំស្តីពីការបង្កើត និង​គ្រប់គ្រងសមាគមមនុស្សចាស់ អន្តរជំនាន់ និងពហុមុខងារ ជាមួយនឹង​ផែនទីចង្អុល​បង្ហាញ​ផ្លូវ ក៏ត្រូវបាន​រៀបចំឡើង រាជរដ្ឋាភិបាល​បាន​ធ្វើសេចក្តី​ព្រៀង​ ដែល​អាច​នឹងបញ្ចប់នាពេលខាង​មុខនេះផងដែរ។ ជាមួយគ្នានេះ មានសមាជិកសហគមន៍ប្រមាណ ១០៥,២២២ នាក់ ក្នុង ចំណោម ១៥២ ភូមិ ដែលទទួលអត្ថប្រយោជន៍ដោយ ប្រយោល តាមរយៈគម្រោង។ 

   ការកើនឡើងនូវប្រជាជនវ័យចាស់ គឺជាបញ្ហាប្រឈមជាសាកលដែលបាននឹងកំពុងកើតឡើងក្នុងពិភពលោក។ នៅឆ្នាំ២០១៥ ពិភពលោកមានមនុស្សចាស់ (ដែលមានអាយុ៦០ឆ្នាំឡើង) ប្រមាណ ១ពាន់លាននាក់ ហើយចំនួននេះនឹងមានការកើនឡើងជាពីរនៅឆ្នាំ២០៥០។ យោងតាមរបាយការណ៍ជាតិជំរឿនឆ្នាំ២០១៩ កម្ពុជាមានប្រជាជនវ័យចាស់ ៨.៩% ឬ ប្រមាណជា ១,៣៨លាននាក់ (ដែលក្នុងនោះស្ត្រីវ័យចាស់មានប្រមាណ៦០%)។ ចំនួនមនុស្សវ័យចាស់នៅកម្ពុជាត្រូវបានព្យាករណ៍ថានឹងកើនឡើងអាចកើនឡើងដល់ ១៣% នៅឆ្នាំ២០២៣០, ១៦% នៅឆ្នាំ ២០៤០ និង រហូតដល់ ២៣% នៃប្រជាជនសរុប នៅឆ្នាំ ២០៥០ ។ កំណើននេះត្រូវការឲ្យមានការយកចិត្តទុកដាក់ ជាពិសេស លើការគាំទ្រទាំងផ្នែកច្បាប់គោលនយោបាយ និង កម្មវិធីនានា។  

  គួរបញ្ជាក់ផងដែរថា រាជរដ្ឋាភិបាលកម្ពុជា បានអនុម័តគោលនយោបាយជាតិស្តីពីមនុស្សវ័យចាស់ ២០១៧- ២០៣០ នៅក្នុងសម័យប្រជុំពេញអង្គគណៈរដ្ឋមន្រ្តី នាថ្ងៃទី ២៥ ខែសីហា ឆ្នាំ២០១៧ ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ ក្នុងស្មារតីនេះ រាជរដ្ឋា ភិបាលកម្ពុជា បានប្តេជ្ញាចិត្តយ៉ាងមុតមាំក្នុងការអនុវត្តគោលនយោបាយជាតិស្តីពីមនុស្សវ័យចាស់នេះ

​ដែលស្របទៅនឹងយុទ្ធសាស្ត្របញ្ចុកោណរបស់រាជរដ្ឋាភិបាល និងផែនការសកម្មភាពអន្តរជាតិទីក្រុងម៉ាឌ្រីដឆ្នាំ២០០២ ក៏ ដូចជាគោលដៅអភិវឌ្ឍន៍ប្រកបដោយចីរភាព សំដៅលើកកម្ពស់សុខុមាលភាពមនុស្សចាស់ឱ្យកាន់តែមានប្រសិទ្ធ ភាព និងឆ្លើយតបទៅនឹងតម្រូវការរបស់ពួកគាត់។ បន្ថែមពីលើនេះ នៅក្នុងអាទិភាពទី៥ នៃគោលនយោបាយជាតិស្តីពីមនុស្សវ័យចាស់នេះផងដែរ ក៏បានផ្តោទៅលើ “សមាគមមនុស្សចាស់ និងវ័យចាស់សកម្ម” សំដៅគាំទ្រ និងបង្កើតអោយមាននូវយន្តការសមាគមមនុស្សចាស់នៅទូទាំងប្រទេស ព្រមទាំងពង្រឹងនូវតួនាទីរបស់សមាគមមនុស្ស ចាស់ទាំងអស់នេះ ក្នុងការរួមចំណែកលើកកម្ពស់ស្ថាន ភាពរស់នៅ និង ឆ្លើយតបទៅនឹងតម្រូវការរបស់មនុស្ស ចាស់នៅតាមមូលដ្ឋាន។ 

  យោងទៅតាមរបាយការណ៍របស់នាយកដ្ឋានមនុស្ស ចាស់ និងអតីតយុទ្ធជន នៃក្រសួងសង្គមកិច្ច អតីតយុទ្ធជន និងយុវនីតិសម្បទា បានអោយដឹងថា​ សមាគមមនុស្សចាស់ចំនួន ១៦៤៦ សមាគម ត្រូវបានបង្កើតឡើងនៅតាមឃុំ-សង្កាត់ ទូទាំង២៥រាជធានី ខេត្ដ នៃប្រទេសកម្ពុជា ដើម្បីជួយដោះស្រាយបញ្ហាប្រឈមនានារបស់មនុស្សចាស់នៅតាមមូលដ្ឋាន និងចូលរួមចំណែកលើក កម្ពស់ស្ថានភាពរស់នៅរបស់ពួកគាត់។ ក្នុងនោះផងដែរ អង្គការមនុស្ស ចាស់កម្ពុជា ក៏បានចូលរួមចំណែកយ៉ាង សកម្មនៅក្នុងកិច្ចសហការ និងជួយរៀបចំគាំទ្រក្នុងការ បង្កើតអោយមានសមាគមមនុស្សចាស់នៅកម្រិតភូមិបានចំនួន ២៣៤ សមាគម ស្ថិតនៅក្នុងចំណោម ៩រាជធានី -ខេត្ត និងជួយគាំទ្រដោយប្រយោលតាមរយៈបណ្តាញមនុស្សវ័យចាស់កម្ពុជា ចំនួន ៤២១ សមាគម ដែលជាសមាជិកភាពក្នុង ចំណោម ១៤ រាជធានី-ខេត្ត នៃព្រះរាជាណាច្រកកម្ពុជា។ 

អំពីអង្គការមនុស្សចាស់កម្ពុជា៖ 

 អង្គការមនុស្សចាស់កម្ពុជា គឺជាអង្គការក្នុងស្រុកមិនមែនរដ្ឋាភិបាល​ ដែលធ្វើការជាមួយមនុស្សចាស់ ដើម្បីឲ្យពួក គាត់អាចដឹកនាំជីវិតរស់នៅថ្លៃថ្នូរមានភាពសកម្ម សុខភាពល្អ និង សុវត្ថិភាព ។ អង្គការមានវត្តមាននៅក្នុងប្រទេសកម្ពុជាចាប់តាំងពីឆ្នាំ​១៩៩២ និងបានបំពេញបេសសកម្មរបស់ខ្លួនក្នុងខេត្តបាត់ដំបង,បន្ទាយមានជ័យ និ​ងសៀមរាប។ អង្គការ គឺ​ជាសមាជិកបណ្តាញសាកលរបស់អង្គការ​មនុស្សចាស់អន្តរជាតិ។ រយៈពេលជាង៣០ឆ្នាំកន្លងមកនេះ អង្គការមនុស្សចាស់ បានដើរតួនាទីយ៉ាងសំខាន់ និងបានចូលរួមចំណែកយ៉ាងសកម្មក្នុងការកៀរគរប្រភពជំនួយពីក្រៅប្រទេសរាប់សិបលានដុល្លា ដើម្បីជួយដោះស្រាយនូវបញ្ហាប្រឈមខាងលើដែលរួមមានទាំងផ្នែកសេដ្ឋកិច្ច សុខភាព បរិស្ថាន យេនឌ័រ និងសិទ្ធិសំដៅលើកកម្ពស់ស្ថានភាពរស់នៅ និង សុខុមាលភាពរបស់ប្រជាជនវ័យចាស់ និង សហគមន៍ពួកគាត់នៅកម្ពុជា ៕ ដោយ ៖ ភារម្យ