ក្រុមមន្រ្តីអាល្លឺម៉ង់និយាយនៅថ្ងៃចន្ទនេះថា ហេតុការណ៍រថភ្លើងធ្លាក់ផ្លូវដែលបណ្តាលឲ្យមនុស្ស ៣នាក់ស្លាប់ និងមនុស្ស ៤១នាក់ផ្សេងទៀត រងរបួស ទំនងជាបណ្តាលមកពីបំណាក់ដី បន្ទាប់ពីស្ថានភាពអាកាសធាតុធ្ងន់ធ្ងរ ។

ប្រធានក្រុមហ៊ុនផ្លូវរថភ្លើងអាល្លឺម៉ង់ Deutsche Bahn លោក Richard Lutz និយាយថា ក្រុមមន្រ្តីបានធ្វើដំណើរទៅកាន់ទីតាំងកើតហេតុ រយៈពេល ១ថ្ងៃក្រោយឧបទ្ទេវហេតុកើតឡើង ហើយលោកបានសម្តែងមរណៈទុក្ខដល់ជនរងគ្រោះ និងក្រុមគ្រួសាររបស់ពួកគេ ។

លោក Lutz និយាយប្រាប់ក្រុមអ្នកសារព័ត៌មានថា ពួកយើងសូមកាន់ទុក្ខជាមួយសាច់ញាតិអ្នកស្លាប់ និងសូមសម្តែងការអាណិតអាសូរ និងការរំលែកទុក្ខរបស់យើងដល់គ្រួសារអ្នកស្លាប់ ។

ខណៈពេលនោះដែរ រដ្ឋមន្រ្តីដឹកជញ្ជូនអាល្លឺម៉ង់លោក Patrick Schnieder បានចាត់ទុកឧបទ្ទេវហេតុមួយនេះថា គួរឲ្យរន្ធត់ និងបានថ្លែងអំណរគុណដល់សេវាកម្មសង្រ្គោះបន្ទាន់ សម្រាប់ការឆ្លើយតបភ្លាមៗរបស់ពួកគេចំពោះគ្រោះថ្នាក់នេះ ។

សូមបញ្ជាក់ថា មនុស្ស ១០០នាក់ បាននៅលើរថភ្លើង ពេលដែលទូរថភ្លើងចំនួន ២ទូ បានធ្លាក់ផ្លូវ នៅចម្លោះទីក្រុង Riedlingen និងទីក្រុង Munderkingen ដែលជាប់ព្រំដែនបារាំង និងស្វីស ៕