ប្រទេសបារាំង កាលពីថ្ងៃចន្ទ (២៨ កក្កដា) បានអំពាវនាវឱ្យសហភាពអឺរ៉ុប ដាក់សម្ពាធកាន់តែខ្លាំងលើអ៊ីស្រាអែល ឱ្យយល់ព្រមលើដំណោះស្រាយរដ្ឋពីរជាមួយប៉ាឡេស្ទីន នៅក្នុងកិច្ចប្រឹងប្រែងចុងក្រោយបង្អស់របស់បារាំង ខណៈពួកគេស្វះស្វែងរកការបញ្ចប់សង្គ្រាមដ៏បង្ហូរឈាមនៅតំបន់ហ្កាហ្សា ប៉ុន្មានថ្ងៃបន្ទាប់ពីការសន្យាទទួលស្គាល់ប៉ាឡេស្ទីនជារដ្ឋ។

លោក Jean-Noël Barrot រដ្ឋមន្ត្រីការបរទេសបារាំង បានប្រាប់អ្នកសារព័ត៌មាននៅអង្គការសហប្រជាជាតិថា៖ ខណៈពេលដែលមានការឯកភាពពីអន្តរជាតិលើពេលវេលាបន្ទាន់ឥឡូវនេះសម្រាប់ដំណោះស្រាយនយោបាយចំពោះជម្លោះអ៊ីស្រាអែល និងប៉ាឡេស្ទីន មហាអំណាចពិភពលោកចាំបាច់ត្រូវបង្ហាញសកម្មភាពជាក់ស្ដែងឱ្យដូចនឹងពាក្យសម្ដីរបស់ខ្លួន។

ថ្លែងនៅថ្ងៃដំបូងនៃកិច្ចប្រជុំជាន់ខ្ពស់របស់អង្គការសហប្រជាជាតិស្តីពីដំណោះស្រាយរដ្ឋពីរចំពោះជម្លោះអ៊ីស្រាអែល និងប៉ាឡេស្ទីន លោក Barrot បាននិយាយថា “គណៈកម្មការអឺរ៉ុប ជំនួសនាមឱ្យសហភាពអឺរ៉ុបទាំងមូល ត្រូវតែបង្ហាញចេញមកនូវក្ដីរំពឹងទុករបស់ខ្លួន និងបង្ហាញពីមធ្យោបាយនានាដែលអាចប្រើដើម្បីជំរុញរដ្ឋាភិបាលអ៊ីស្រាអែលឱ្យស្តាប់តាមការអំពាវនាវនេះ”។

សន្និសីទ ដែលត្រូវបានពន្យារពេលពីខែមិថុនា និងបន្ទាបកម្រិតដល់ថ្នាក់រដ្ឋមន្ត្រីនេះ កំពុងប្រព្រឹត្តទៅនៅទីក្រុងញូវយ៉ក សហរដ្ឋអាមេរិក ខណៈការថ្កោលទោសអន្តរជាតិចំពោះសកម្មភាពសង្គ្រាមរបស់អ៊ីស្រាអែល នៅហ្កាហ្សា ឈានដល់ភាពក្តៅគគុក។ ទាំងអ៊ីស្រាអែល និងសម្ព័ន្ធមិត្តជិតស្និទ្ធបំផុតរបស់ខ្លួន គឺសហរដ្ឋអាមេរិក បានបដិសេធមិនចូលរួមក្នុងកិច្ចប្រជុំនេះ ក្នុងអ្វីដែលលោក Barrot និយាយថា កំពុងត្រូវបានចូលរួមដោយតំណាងនៃប្រទេសចំនួន១២៥ រួមទាំងរដ្ឋមន្ត្រីចំនួន ៥០រូប ផងដែរ៕