ប្រធានាធិបតីអ៊ុយក្រែន លោក Volodymyr Zelenskiy បានលើកសរសើរដល់លោកប្រធានាធិបតីអាមេរិក Donald Trump កាលពីថ្ងៃចន្ទ (២៨ កក្កដា) ចំពោះ "ការប្តេជ្ញាចិត្ត" របស់លោកក្នុងការសម្រេចឱ្យមានពេលវេលាកំណត់កាន់តែខ្លីជាងមុន ដើម្បីស្វះស្វែងរកវឌ្ឍនភាពសម្រាប់ការបញ្ចប់សង្គ្រាមរបស់រុស្ស៊ី ជាមួយអ៊ុយក្រែន។

លោក Zelenskiy បានសរសេរលើវេទិកាប្រព័ន្ធផ្សព្វផ្សាយសង្គម X ថា "ជំហរច្បាស់លាស់ និងការប្តេជ្ញាចិត្តនេះគឺទាន់ពេលវេលាណាស់ នៅពេលដែលការផ្លាស់ប្តូរជាច្រើនអាចកើតឡើងតាមរយៈកម្លាំងរឹងមាំដើម្បីសន្តិភាពពិតប្រាកដ"។ លោក Zelenskiy ក៏បានថ្លែងអំណរគុណដល់លោក Trump សម្រាប់ការយកចិត្តទុកដាក់លើការសង្គ្រោះជីវិត និងការបញ្ឈប់សង្រ្គាមដ៏អាក្រក់នេះ។

នៅក្នុងសុន្ទរកថាវីដេអូពេលយប់របស់ខ្លួន លោក Zelenskiy បានលើកសរសើរម្តងទៀតនូវសេចក្តីថ្លែងការណ៍ "ដ៏សំខាន់ជាពិសេស" របស់លោក Trump នៅក្នុងពន្លឺនៃ "ការព្យាយាមឥតឈប់ឈររបស់រុស្ស៊ី ក្នុងការបង្កភាពឈឺចាប់ដល់អ៊ុយក្រែន" តាមរយៈការវាយប្រហារតាមអាកាសលើទីក្រុងនានា។ លោកសង្កត់ធ្ងន់ថា អ៊ុយក្រែនមើលឃើញថាការដាក់ទណ្ឌកម្មដ៏តឹងតែងលើរុស្ស៊ី ជា "ធាតុសំខាន់" ក្នុងការបញ្ចប់សង្រ្គាម។

គួរឱ្យដឹងថា លោក Trump កាលពីថ្ងៃចន្ទ ២៩ កក្កដា បានប្រកាសកាត់បន្ថយពេលវេលាកំណត់រយៈពេល ៥០ថ្ងៃ ដែលកាលពីពីរសប្ដាហ៍កន្លងទៅលោកធ្លាប់បានផ្តល់ឱ្យសមភាគីរុស្ស៊ី លោក Vladimir Putin ដើម្បីឈានដល់បទឈប់បាញ់ជាមួយអ៊ុយក្រែន មកត្រឹមរយៈពេល ១០ ឬ ១២ថ្ងៃវិញ ដែលមានន័យថា លោកចង់ឱ្យកិច្ចប្រឹងប្រែងសន្តិភាពឈានទៅមុខនៅថ្ងៃទី ៧-៩ ខែសីហា ដ៏ឆាប់ខាងមុខនេះ៕