ជនប៉ាឡេស្ទីន បានបង្ហាញនូវការខឹងសម្បាររបស់ពួកគេចំពោះការព្រមានគ្រោះទុរ្ភិក្ស ចេញដោយក្រុមតាមដានភាពអត់ឃ្លានសកលលោក ដោយពួកគេនិយាយថា ការពិតនោះគឺ ពួកគេបានស្លាប់អស់រយៈពេល ៥ខែមកហើយ រស់មែនតែដូចជាមនុស្សស្លាប់អញ្ចឹង ។

លោក Omar Abu Attiya គឺជាជនប៉ាឡេស្ទីនមួយរូបនិយាយថា ពួកយើងបានស្លាប់អស់រយៈពេល ៥ខែមកហើយ ។ តើកន្លែងណាខ្លះដែលពួកយើងបានឆ្លងកាត់នាពេលកន្លងមក?

លោកបន្តថា ពួកយើងនៅរស់មែន តែដូចជាមនុស្សស្លាប់អញ្ចឹង គ្មាននរណាម្នាក់ខ្វាយខ្វល់ពីពួកយើងនោះឡើយ ។ ក្រោយពួកយើងស្លាប់ទៅ តើមានការប្រកាសពីពួកយើងអត់? តើសិទ្ធិមនុស្សនៅឯណា? តើសហភាពអឺរ៉ុបនៅឯណា? ឯណាទៅមនុស្សដែលមានមនសិការនោះ? ពេលដែលមនុស្សស្លាប់រួចទៅហើយនោះ វាដល់ពេលដែលពួកគេត្រូវចាប់ផ្តើមនិយាយថា មនុស្សនឹងស្លាប់មែនឬ? 

លោក Attiya និយាយថាទៀតថា ក្រឡេកមើលជីវិតរបស់ពួកយើងនៅក្នុងសាលារៀន ស្ថានភាពដែលពួកយើងកំពុងរស់នៅ ស្ថានភាពពិតជាពិបាកខ្លាំងណាស់ ។ ពួកយើងបានធ្វើដំណើរទៅកាន់ផ្ទះបាយស៊ុប តែគ្មានទេអាហារ ដោយសារតែគ្មានជំនួយចូល ។ ពួកយើងបានឈានដល់ដំណាក់កាលមួយដែលក្មេងៗស្លាប់ដោយសារភាពអត់ឃ្លាន មាននូវមនុស្សស្លាប់ច្រើនណាស់ដោយសារកង្វះអាហារូបត្ថម្ភ ក៏ដូចជាយុវជន ស្រ្តី និងមនុស្សចាស់ ។

កាលពីព្រឹកថ្ងៃអង្គារ ក្រុមឃ្លាំមើលភាពអត់ឃ្លាន IPC និយាយថា គ្រោះទុរ្ភិក្សនឹងកើតមាននៅតំបន់ហ្កាហ្សាស្រ្ទីប ជាមួយនឹងភ័ស្តុតាងនៃការកើនឡើងចំនួនមនុស្សស្លាប់ពាក់ព័ន្ធនឹងភាពអត់ឃ្លាន ៕