មន្ត្រីក្នុងតំបន់បាននិយាយថា មនុស្សយ៉ាងហោចណាស់ ២៥ នាក់ត្រូវបានសម្លាប់នៅទូទាំងប្រទេសអ៊ុយក្រែនក្នុងរយៈពេលមួយយប់ និងព្រឹកព្រលឹម ពីការវាយប្រហារតាមអាកាសរបស់រុស្សី ដែលបានវាយប្រហារពន្ធនាគារ និងមន្ទីរពេទ្យមួយ។ 

ពួកគេនិយាយថា ការវាយប្រហារដ៏សាហាវបំផុតគឺនៅលើពន្ធនាគារ Bilenke ក្នុងតំបន់ Zaporizhzhia ភាគខាងត្បូង ដែលអ្នកទោស ១៦ នាក់បានស្លាប់ និងជាង ៥០ នាក់បានរងរបួស។

ការវាយប្រហាររបស់រុស្ស៊ីដោយឡែកពីគ្នាទៅលើមនុស្សដែលឈរតម្រង់ជួររកជំនួយមនុស្សធម៌បានសម្លាប់មនុស្សប្រាំនាក់នៅក្នុងតំបន់ Kharkiv ភាគឦសាន។ មនុស្ស ៣ នាក់ត្រូវបានសម្លាប់នៅក្នុងតំបន់ Dnipropetrovsk ភាគកណ្តាលរួមទាំងស្ត្រីមានផ្ទៃពោះម្នាក់។ ជនរងគ្រោះម្នាក់ទៀតត្រូវបានរាយការណ៍នៅកន្លែងផ្សេងក្នុងតំបន់នោះ។  

ក្រោយមកនៅថ្ងៃអង្គារ លោក Donald Trump បានបញ្ជាក់ពីថ្ងៃផុតកំណត់ ឬឱសានវាទនៅថ្ងៃទី ៨ ខែសីហា សម្រាប់ប្រទេសរុស្ស៊ី ដើម្បីយល់ព្រមលើបទឈប់បាញ់ ពុំនោះនឹងប្រឈមទណ្ឌកម្មដ៏ធ្ងន់ធ្ងរ។

ប្រធានាធិបតីអាមេរិករូបនេះ បានចេញឱសានវាទមួយទៅកាន់ទីក្រុងមូស្គូកាលពីថ្ងៃចន្ទសប្ដាហ៍នេះក្នុងអំឡុងដំណើរទស្សនកិច្ចទៅកាន់ចក្រភពអង់គ្លេសដោយនិយាយថាលោកនឹងកាត់បន្ថយរយៈពេល ៥០ថ្ងៃដែលបានផ្តល់ឱ្យប្រធានាធិបតីរុស្ស៊ីលោក Vladimir Putin កាលពីដើមខែនេះ។

ជាការឆ្លើយតបទៅនឹងការវាយប្រហារទាំងយប់លើអ៊ុយក្រែន លោក Zelensky បាននិយាយថា ប្រទេសរុស្ស៊ីត្រូវតែបង្ខំឱ្យបញ្ឈប់ការសម្លាប់ និងបង្កើតសន្តិភាព តាមរយៈការដាក់ទណ្ឌកម្មតឹងរ៉ឹង៕